— लियोनल मेसीले गोल गर्ने क्षमता कायम राख्दै इन्टर मियामीलाई लिग कपको फाइनलमा पुर्याएका छन् । उनको आकर्षक गोलसँगै फिलाडेल्फिया युनियनलाई ४–१ ले हराएर मंगलबार इन्टर मायमी फाइनलमा पुगेको हो ।
अर्जेन्टिनी सुपरस्टार मेसीले फिलाडेल्फियाको सुबरु पार्कमा रोमाञ्चक गोल गर्दै इन्टर मियामीका लागि ६ खेलमा ९ गोल पुर्याएका हुन् । इन्टर मियामीका लागि भेनेजुएलाका खेलाडी जोसेफ मार्टिनेज, बार्सिलोनामा मेसीका पूर्वसहकर्मी जोर्डी अल्बा र सब्स्टिच्युट डेविड रुइजले पनि गोल गरे । सेमिफाइनलमा फिलाडेल्फियाबाट अलेजान्द्रो बेदोयाले गरेको गोल सान्त्वना बन्यो ।
यस नतिजासँगै मेसी करिअरको ४२ औं उपाधि नजिक पुगेका छन् । मेक्सिको र मेजर लिग सकरका टिमले प्रतिस्पर्धा गर्ने विश्वकप शैलीको प्रतियोगिता लिग कपको शनिबार हुने फाइनलमा इन्टर मियामीले नेसभिल एससीविरुद्ध प्रतिस्पर्धा गर्नेछ । नेसभिलले मंगलबार नै भएको अर्को सेमिफाइनलमा मेक्सिकन टिम मोन्टेरेरीको चुनौती २–० ले पन्छाउँदै फाइनलमा स्थान सुरक्षित गरेको हो । लिग कपको फाइनल पनि उसैको मैदानमा हुँदै छ ।
सेमिफाइनलको जितसँगै इन्टर मियामी अर्को सिजनको क्षेत्रीय प्रतियोगिता कन्काकाफ च्याम्पियन्स कपमा पनि छनोट भएको छ । यो प्रतियोगितामार्फत टोलीले फिफाको विस्तारित प्रतियोगिता क्लब विश्वकप २०२५ मा स्थान बनाउन सक्छ ।
‘हाम्रो लक्ष्य अर्को सिजनको अन्तर्राष्ट्रिय प्रतियोगितामा छनोट हुने हो, जुन आज (मंगलबार) राति हामीले पूरा गरेका छौं,’ इन्टर मायमीका मुख्य प्रशिक्षक गेरार्डो टाटा मार्टिनोले भने, ‘यसमा सबैभन्दा महत्त्वपूर्ण कुरा कन्काकाफ च्याम्पियन्स कपमा छनोट भएको उपलब्धि हो ।
अब हामीले यस प्रतियागिता जित्ने तयारी गर्नुपर्छ, जसले हामीलाई धेरै उत्साह प्रदान गर्नेछ र आत्मविश्वासी बनाउने छ ।’
