काठमाडौं । नेपाली राष्ट्रिय क्रिकेट टिमका कप्तान रोहितकुमार पौडेल एसिय कप क्रिकेटमा भारत र पाकिस्तानविरुद्ध उत्कृष्ट खेल्ने बताएका छन् ।
एसिया कप क्रिकेट खेल्न जाने टोलीलाई नेपाल क्रिकेट संघ (क्यान)ले गरेको बिदाइ कार्यक्रममा उनले भारत र पाकिस्तानसँग नेपाली टिमले एक उत्कृष्ट क्रिकेट खेल्ने बताएका हुन् ।
‘भारत र पाकिस्तान दुवैसँगको खेल एकदमै प्रतिस्पर्धी हुनेछ । दुवै टिमले एकै स्थानबाट सुरु गर्ने हो,’ उनले भने, ‘क्रिकेटमा जुनसुकै टिमले पनि जित्न सक्छ । त्यो दिन जसले राम्रो खेल्छ उसैले जित्ने हो । हामीले राम्रो खेल्यौं भने जित्छौं ।’
‘हामी मानसिक रुपमा पनि तयार छौं । १५ दिनको ब्रेकमा सबैले आफ्नो आफ्नो कमजोरीमा काम गरेका छन् । त्यसैले हामी उत्साहित र तयार छौं’, रोहितले भने ।
नेपाली टिमको आत्मविश्वास बलियो रहेकाले दुवै बलिया टिमसँग खेल्ने उत्साह रहेको रोहितले बताए ।
प्रशिक्षक मोन्टी देशाइ पनि यो प्रतियोगिताको लागि आफू निकै सकरात्मक रहेको बताए । ‘५/६ महिना हामी जित्ने मानसिकताले खेलिरहेका थियौं । म त्यो मानसिकता कहिल्यै परिवर्तन नहोस् र बारम्बार देखियोस् भन्ने चाहन्छु’, प्रशिक्षक मोन्टी देशाइले भने ।
एसिया कप क्रिकेटका लागि नेपाली टिम आजै पाकिस्तान प्रस्थान गर्दै छ । पाकिस्तानमै अभ्यास गरेर घरेलु टोलीसँग एसिया कपमा आफ्नो पहिलो खेल खेलेर नेपाल भारतसँगको खेलका लागि श्रीलंका जाने छ ।
