— चीनको हाङझाउमा हुने १९ औं एसियाली खेलकुद सुरु हुन बिहीबार ३० दिन बाँकी रहेको छ । आयोजक सहर यो प्रतियोगिता इतिहासमै सबैभन्दा सफल हुनेमा विश्वस्त देखिएको छ ।
प्रतियोगिताको कार्यकारी महासचिव चेन वेइछिङले हाङझाउमा पत्रकार सम्मेलन गर्दै हाङझाउ सहरले आठ वर्ष लगाएर गरेको तयारी सम्पूर्ण रूपमा पूरा भएको बताएका छन् । चीनमा हुन लागेको यो तेस्रो एसियाली खेलकुद हो । यसअघि पेचिङ र ग्वाङझाउले यो प्रतियोगिताको सफल आयोजना गरेको थियो । कोभिड भाइरस संक्रमण महामारीको कारण एक वर्ष पछाडि सरेको प्रतियोगिताको सफल आयोजनाका लागि हाङझाउ पूर्ण तयार देखिएको छ ।
प्रतियोगितामा कुल ४ सय ८१ स्वर्णका लागि प्रतिस्पर्धा हुनेछ । प्रतियोगिताको अन्तिम पूर्ण कार्यक्रम अगस्ट महिनाको अन्त्यसम्म प्रकाशित हुनेछ । प्रतियोगिता असोज ६ देखि २१ सम्म आयोजना हुनेछ । आयोजकका अनुसार यसमा पहिलो स्वर्णको निर्णय उद्घाटन समारोहको भोलिपल्ट फुयाङ वाटर स्पोर्टस सेन्टरमा हुने प्रतिस्पर्धामा हुनेछ । बिहीबार आयोजित पत्रकार सम्मेलनअनुसार ४५ देशको सहभागिता रहनेछ । सबै दर्ता प्रक्रिया पनि पूरा भइसकेको छ ।
भदौ २२ मा हाङझाउबाट टर्च र्याली सुरु हुनेछ । त्यसमा २ हजार २२ को सहभागिता रहनेछ । त्यसमा सबैभन्दा कान्छा सहभागी १४ वर्ष र सबैभन्दा पाका सहभागी ८४ वर्षका हुनेछन् । प्रतियोगिताको सफल आयोजनाका लागि ३७ हजार ६ सय स्वयंसेवक सहभागी हुने पनि आयोजकले जनाएको छ ।
पत्रकार सम्मेलनका क्रममा आयोजकले पदक वितरण समारोह कस्तो हुनेछ भनेर त्यसको पूरा विवरण पनि प्रस्तुत गरेको छ । यो कार्यक्रम पूर्णतः हाङझाउको संस्कृतिमा आधारित हुनेछ । त्यसै अनुसार फुलको गुच्छा तथा पोडियम प्रयोगमा आउने छन् । यी सबैले खेलभावनामा जोड दिने पनि आयोजकले भनेको छ । पत्रकार सम्मेलनकै अवसरमा प्रतियोगिताको आधिकारिक गीत सार्वजनिक गरेको छ । यसको शीर्षक रहेको छ, ‘द लभ वी सेयर’ ।
एसियाडमा नेपालबाट २ सय ५३ खेलाडीले भाग लिने छन् । प्रतियोगितामा हुने ४० खेलमा नेपालले २९ खेलमा प्रतिनिधित्व गर्दै छ । यसपालि धेरै टिम खेललाई प्राथमिकतामा राखेर लैजाने राखेपले जनाएको छ ।
सन् १९५१ मा भारतको नयाँदिल्लीमा भएको पहिलो संस्करणदेखि नै नेपालले एसियाडमा भाग लिन थालेको हो । नयाँदिल्लीदेखि अहिले हाङझाउसम्म आइपुग्दा नेपाली खेलाडी एसियाडका १८ संस्करण खेल्न लागिरेहको छ । तर नेपालले स्वर्ण पदक जित्न सकेको छैन । दुई रजत र २२ कांस्य पदकमै नेपालको एसियाड इतिहास अल्झेको छ ।
