— लिभरपुलले इंग्लिस प्रिमियर लिगमा आइतबार एस्टन भिल्लामाथि ३–० को प्रभावशाली जित निकालेको छ ।
एनफिल्डमा भएको खेलमा डोमोनिक सोबजलाइज र मोहम्मद सलाहले गोल गरे । अर्को गोल म्याटी क्यासको नाममा आत्मघाती रह्यो । यो जितपछि लिभरपुलको चार खेलबाट १० अंक भएको छ र नयाँ सिजन लिगमा अपराजित रहेको छ ।
भिल्ला छ अंकमा रह्यो । अर्को खेलमा ओडसन एडुवार्डको दुई गोल मद्दतले क्रिस्टल प्यालेसले उल्भ्सलाई ३–२ ले पराजित गर्यो । प्यालेसले एडुवार्डको गोलले अग्रता लिएयता उल्भ्सका लागि ह्वाङ हि–चानले बराबरी गोल फर्काए । त्यसपछि एडुवार्ड र इबेरेची एजेले एक–एक गोल गरे । खेलको अन्त्यतिर उल्भ्सका लागि म्याथेस कुन्हाले सान्त्वना गोल फर्काए ।
किशोर खेलाडी इभान फर्गुसनको ह्याट्रिक मद्दतले न्युकासल युनाइटेडलाई ३–१ ले हराएको थियो । आयरल्यान्डका १८ वर्षीय स्ट्राइकरले २७, ६५ र ७० औं मिनेटमा गोल गरे । यस जितपछि ब्राइटनको चार खेलबाट नौ अंक भएको छ ।
स्पेन
म्याड्रिड– जुड वेलिङघमले दोस्रो हाफको इन्ज्युरी समयको पाँचौं मिनेटमा गरेको निर्णायक गोल मद्दतले रियल म्याड्रिडले शनिबार स्पेनी ला लिगामा गेटाफेलाई २–१ ले हराएको छ । नयाँ सिजन रियलको यो लगातार चौथो जित हो । यससँगै उसको १२ अंक भएको छ र लिग तालिकाको शीर्ष स्थानमा छ ।
बर्नाबाउमा भएको खेलमा बोरजा मायोरलको गोलले गेटाफेले ११ औं मिनेटमा अग्रता लिएको थियो । त्यसपछि जोसेलुले ४७ औं मिनेटमा बराबरी गोल फर्काए । अन्य खेलमा रियल सोसिडाडले ग्रेनेडालाई ५–३, एलालेभसले भ्यालेन्सियालाई १–० र रियल बेटिसले रायो भाल्कानोलाई १–० ले पराजित गरे ।
इटाली
नेपल्स– डिफेन्डिङ च्याम्पियन नेपोलीले इटालीको सिरी ‘ए’ मा शनिबार घरमै लाजियोसँग २–१ को स्तब्धपूर्ण हार बेहोरेको छ । नयाँ सिजन सुरु भएयता नेपोलीको यो पहिलो हार हो । लाजियोका लागि लुइस अल्बर्टो र कामादाले गोल गरे । जापानी मिडफिल्डर कामदाले इन्ट्राख्ट फायन्कफर्टबाट लाजियो आएयता गरेको यो पहिलो गोल हो । नेपोलीका लागि पिट्र जिलिन्स्कीले एक गोल फर्काए । यसअघि बोलोग्नाले कागलिरीलाई २–१ ले हरायो भने युडिनेजी र फ्रोसिनेले गोलरहित बराबरी खेले ।
