— स्पेनी मिडफिल्डर जेनी हर्मोसोले महिला विश्वकपको उपाधि पहिलोपल्ट आफ्नो देशलाई दिलाउन उत्कृष्ट खेल प्रदर्शन गरेकी थिइन् । तर, उनी त्यसपछि अनपेक्षित रूपमा स्पेनी फुटबलमा ‘लैंगिक विभेदविरुद्धकी नेता’ भएकी छन् ।
स्पेनी फुटबल महासंघका अध्यक्ष लुइस रुबिलेसले सिड्नीमा भएको पुरस्कार वितरण समारोहमा जबरजस्ती जेनीको ओठमा चुम्बन गरेका थिए, जसले आलोचनाको तरंग नै ल्याइदियो । यसमा विश्वकै ध्यान केन्द्रित भएको छ, जसले उनको टिमको सफलतालाई ओझेलमा पारिदिएको छ । रुबिलेसले पदबाट राजीनामा दिन अस्वीकार गरेका छन् । चुम्बन सहमतिमै भएको दाबी गरेका छन्, जसलाई ३३ वर्षीया जेनीले अस्वीकार गरिदिएकी छन् । त्यसैले विश्वले नै साथीहरूसँग बिदामा रहेकी जेनीको तर्फबाट रुबिलेसविरुद्धको संघर्षमा साथ दिएका छन् । यसलाई उनले फुटबलमा अहिलेसम्मकै सबैभन्दा राम्रो भन्दै खुसियाली मनाएकी छन् ।
रुबिलेसले आफ्नो भाषणमा राजीनामा गर्न अस्वीकार गरेपछि परिस्थिति झनै उर्लियो र जेनीले पनि बलिया शब्दसाथ पुरुषप्रधान कार्यबाट दुर्व्यवहार पीडित भएकी भन्दै प्रस्ट पारेकी छन् । उनीसँगै स्पेनका ८१ जना खेलाडीले राष्ट्रिय टिमबाट नखेल्ने भन्दै हड्ताल घोषणा गरेका छन् । उनीहरूले नेतृत्व परिवर्तन नभएसम्म नफर्कने बताएका छन् । विश्व फुटबलको सर्वोच्च संस्था फिफाले रुबिलेसलाई निलम्बन गरिसकेको छ । स्पेनको फौजदारी अदालतले यौन हिंसाका बारेमा अनुसन्धान थालेको छ र जेनीलाई मुद्दा दायर गर्न बोलाएको छ । यी सबै कुराको बाबजुद जेनीको खेल करिअरका लागि विश्वकपको जित महत्त्वपूर्ण छ ।
उनी एट्लेटिको म्याड्रिडका पूर्वगोलकिपर एन्टोनियो हर्नान्डेजकी नातिनी हुन् । म्याड्रिडमा जन्मिएकी उनले युवा अवस्थामा एट्लेटिकोबाटै खेल्न सुरु गरेकी थिइन् । उनले बच्चा छँदा पार्कमा पनि खेलेकी छन्, जसले उनलाई आफ्नै शैलीमा ढाल्न सहयोग गरेको सोच्छिन् । उनले फर्नान्डो रेडोन्डो र जिनेदिन जिदान रियल म्याड्रिडमा रहँदा खेल हेरेर रमाइलो गरेकी थिइन् । तर, एट्लेटिकोमा आबद्ध हुनुपूर्व उनको कुनै त्यस्तो निश्चित आदर्श खेलाडी थिएन । त्यहाँ महिला टिमकी खेलाडी अना फर्नान्डेज थिइन्, जो नर्भी नामले चिनिएकी थिइन् । उनले तत्कालै जेनीलाई हेर्न थालिन् ।
खेलाडी छनोटकर्ताका लागि कुनै बजेट थिएन, जुन भूमिका सिनियर महिला खेलाडीले पूरा गर्थे । नर्भीले जेनीलाई छनोट गरेकी थिइन् । त्यतिबेला ५० युवालाई क्लबमा आबद्ध गर्न अर्का एक खेलाडी पनि छनोट गरिएको थियो । ‘उनी म जस्तै बायाँहाते थिइन् । उनी पनि उही पोजिसनमा खेल्थिन्, जहाँ म खेल्थें । र, उनी जस्तो थिइन्, मलाई त्यो मलाई मनपरेको थियो । उनमा धेरै आकर्षण थियो,’ तीन वर्षअघि जेनीले भनेकी थिइन् । उनी सन् २०१० मा रायो भालेकानोमा पुगिन्, जहाँ उनले स्पेनी लिगको उपाधि जितिन् । त्यसपछि उनले छोटो समय स्विडेनी क्लब टारेसोबाट पनि खेलिन् । उनले ब्राजिली लिजेन्ड मार्टासँगै पनि खेलेकी छन् ।
उनी जनवरी २०१४ मा बार्सिलोना गइन्, जहाँ उनी महिला टिमको इतिहासकै सबैभन्दा बढी गोलकर्ता भइन् । उनले दुईपल्ट बार्सिलोनामा रहँदा २ सय २४ खेलमा १ सय ८१ गोल गरिन् । सन् २०१७ मा उनी पेरिस सेन्ट जर्मेनमा एक सिजनका लागि आबद्ध भइन् । एट्लेटिको फर्कनुअघि एक सिजन बिताइन् । उनी एट्लेटिकोबाट फेरि २०१९ मा बार्सिलोना फर्केकी थिइन् । उनी बार्सिलोनाले पहिलोपल्ट च्याम्पियन्स लिगको उपाधि २०२१ जित्दा टिमकी सदस्य थिइन् । चेल्सीलाई फाइनलमा ४–० ले पराजित गर्दा उनले पेनाल्टी जितेकी थिइन् ।
मैदानबाहिर सहकर्मीहरू जेनीलाई ड्रेसिङ रूममा डिजेको रूपमा देख्ने गर्छन् । उनलाई अगाडि पठाइँदैन थियो । यी प्लेमेकरलाई फल्स नाइनमा खेलाइन्थ्यो । उनी अहिले मेक्सिकन क्लब पाचुकामा छन्, जहाँ उनले २०२२ मा हस्ताक्षर गरेकी थिइन् । उनलाई माथिल्लो स्तरबाट टाढिएको भनेर केहीले सुझाव पनि दिएका थिए ।
‘म सेवानिवृत्त भएकी थिएँ र मैले विश्वकप जितें,’ उनले सामाजिक सञ्जालमा आलोचकमाथि आक्रोश पोखेकी छन् । गम्भीर विवादमा परेकी भए पनि यसले उनलाई पोख्त बनाउँदै लगेको छ । उनी स्पेनी महिला टिमकै सबैभन्दा बढी गोलकर्ता हुन् । उनले इंग्ल्यान्डविरुद्ध फाइनलमा पेनाल्टीमा चुके पनि ५१ गेल गरेकी छन् । उनले घुँडाको चोटका कारण युरो २०२२ गुमाएकी थिइन् । र, उनी प्रशिक्षक जोर्गे भिल्दा र फुटबल महासंघसँगको विवादमा परेर राष्ट्रिय टिमबाट बाहिरिएका १५ खेलाडीमा पनि थिइनन् ।
‘कहिलेकाहीं अवसर एकपल्ट मात्रै आउँछ । इमान्दारीपूर्वक भन्नुपर्दा मानिसले के भन्छ म वास्ता गर्दिनँ,’ विश्वकपअघि उनले भनेकी थिइन् । विद्रोह गरेकामध्ये तीन खेलाडी टिममा फर्किए र विश्वकपको उपाधि पनि जिते । तर, अब बाँकी टिम र अरू धेरै खेलाडीले स्पेनी फुटबल महासंघको नेतृत्व परिवर्तन नभएसम्म भनेर आफैंलाई बाहिर राखेका छन् । जेनीलाई आफ्नै फुटबलका आदर्श पत्ता लगाउन केही समय लागेको थियो । तर, अर्को पुस्ताका लागि उनी त्यो व्यक्तित्व भइसकेकी छन् ।’
