— सन ह्युङ–मिनको ह्याट्रिकको सहयोगमा टोटेनहम हर्टस्परले पछाडि परेको स्थिति उल्टाउँदै बर्नलीलाई टर्फ मुरमा शनिबार ५–२ ले पराजित गरेर प्रिमियर लिगको नयाँ सिजनमा अपराजित यात्रा कायम राखेको छ ।
लिली फोस्टरले आकर्षक गोलमा चौथो मिनेटमै बर्नलीलाई अगाडि बढाएका थिए । तर, कप्तान सनले १२ औं मिनेटमै टोटेनहमलाई बराबरी दिलाए । त्यसपछि पाहुना टिमले पछाडि फर्किनुपरेन । क्रिस्टियन रोमेरोले पहिलो हाफको इन्ज्युरी समयमा उत्कृष्ट गोल गर्दै टोटेनहमलाई २–१ ले अघि बढाए । जेम्स म्याडिसनले ५४ औं मिनेटमा टोटेनहमको अग्रता बढाए । त्यसपछि ६३ र ६६ औं मिनेटमा गोल गर्दै सनले ह्याट्रिक पूरा गरे । उनले गत वर्ष सेप्टेम्बर लेस्टरलाई ६–२ ले पराजित गरेयता पहिलो ह्याट्रिक गरेका हुन् । उनले प्रिमियर लिगमा चौथोपल्ट ह्याट्रिक गरेपछि आंगे पोस्टेकोग्लुको टिम अंकतालिकाको दोस्रो स्थानमा उक्लियो । अन्तिम समयमा जोस ब्रोनहिलले गोल गर्दै बर्नलीको हार अन्तर छोट्याएका थिए ।
अर्को खेलमा डिफेन्डिङ च्याम्पियन म्यानचेस्टर सिटीले फुलहमलाई ५–१ ले हरायो । उक्त खेलमा इर्लिङ हालान्डले पनि ह्याट्रिक गरे । उनले व्यक्तिगत पहिलो गोल ५८ औं मिनेटमा गरेका थिए । प्राप्त पेनाल्टीलाई ७० औं मिनेटमा गोलमा परिणत गरेका हालान्डले इन्ज्युरी समयमा अर्को गोल गर्दै ह्याट्रिक पूरा गरेका हुन् । यससँगै उनले यो सिजनका चार खेलमा ६ गोल पुर्याएका छन् । सिटीको शतप्रतिशत जितमा जुलियन अल्भारेज र नाथन अकेले पनि गोल गरे । खेलमा पहिलो गोल गर्ने क्रममा अल्भारेजलाई बल हालान्डले दिएका थिए । फुलहमलाई ३३ औं मिनेटमा टिम रिमले १–१ को स्थितिमा पुर्याए पनि त्यसलाई फुलहमले कायम राख्न सकेन ।
अर्नोट डान्जुमाको गोलमा एभरटन लगातार चार हार बेहोर्नबाट बचेको छ । डच फरवार्डले ५५ औं मिनेटमा गोल गरेपछि एभरटनले सेभिल्ड युनाइटेडलाई २–२ मा रोक्यो । सिन डायचको टिमले यसपालि खराब सुरुआत गरेको छ । तर, प्रिमियर लिगको नवप्रवेशी क्लब सेफिल्डको बराबरीले पनि एभरटनलाई सबैभन्दा खराब स्थितिमै पुर्याएको छ ।
पहिलो हाफसम्म सेभिल्ड २–१ ले अगाडि थियो । तर, अग्रता भने एभरटनले लिएको थियो । अब्दोउलेय डोकोरेले १४ औं मिनेटमा यो सिजनको लिगमा एभरटनको पहिलो गोल गरेका थिए । तर, क्यामरुन आर्चरले बराबरी गरिदिए भने एभरटनका गोलकिपर जोर्डन पिकफोर्डले आफ्नै पोस्टमा गोल गरेपछि सेफिल्डले अग्रता लिएको हो । भिल्लारियलबाट ‘लोन’ मा आएका डान्जुमाले गोल गर्दै एभरटनलाई अंक दिलाएका हुन् । तर, यो सिजन पनि डायचको टिमले रेलिगेसन टार्न संघर्ष गर्नुपर्ने देखिएको छ । यो सिजनको पहिलो अंक जोडेको एभरटन १८ औं स्थानमा छ । सुरुका तीन खेल हारेको अवस्थामा एभरटनलाई गोल अन्तरमा उछिनेको सेफिल्ड एक स्थानमाथि छ ।
एभरटनले लिग कपमा यसै साता चौथो श्रेणीको क्लब डंकास्टरलाई २–१ ले हराएको थियो । टोलीले लिगमा विपक्षी टिमको मैदानमा भएका पछिल्ला २३ खेलमध्ये दुई खेलमात्रै जितेको छ । एभर्टनले पछिल्ला दुई सिजन मुस्किलले रेलिगेसन टारेको छ । एलेक्स इओबी र निल मुपेलाई बिक्री गरे पनि स्थानान्तरणको अन्तिम दिन शुक्रबार खेलाडी अनुबन्ध गर्न असफल एभरटनमा तनाव नै देखियो । यो सिजनमा ३ सय १६ मिनेट र ४६ प्रहारपछि बल्ल सेफिल्डविरुद्ध १४ औं मिनेटमा गोलको खाता खोल्यो ।
पहिलो हाफको इन्ज्युरी समयमा मैदानमा प्रवेश गरेका एन्थोनी एलाङ्गाले ४८ औं मिनेटमा गोल गरेपछि नटिङ्घम फरेस्टले स्टामफोर्ड ब्रिजमा चेल्सीलाई १–० ले हरायो । ब्रेनफोर्डले घरेलु मैदानमा बर्नमाउथसँग २–२ खेल्दै अंक बाँड्यो । शुक्रबारको खेलमा वेस्टह्यामले ल्युटनमाथि २–१ को जित हात पारेको थियो ।
