— नोभाक जोकोभिचले ड्यानिल मेभडेभेडलाई सिधा सेटमा पराजित गर्दै शनिबार यूएस ओपनको उपाधि जितेका छन् । उनले जितेको यो चौथो यूएस ओपनको उपाधि हो । यस्तै जोकोभिचले २४औं ग्रान्ड स्लामको उपाधि जित्दै कीर्तिमान बराबर पनि गरेका छन् ।
दुई वर्षअघिको यूएस ओपन फाइनलमा जोकोभिच रुसी खेलाडी मेडभेडेभकै हातबाट पराजित भएका थिए । अब उनले यसको पनि बदला लिएका छन् । यससँगै उनी एकै सिजन चार पल्ट तीन ग्रान्ड स्लामको उपाधि जित्ने पहिलो खेलाडी पनि भएका छन् ।
आधुनिक समयमा सबैभन्दा बढी उमेरमा यूएस ओपन जित्ने कीर्तिमान पनि बनाएका ३६ वर्षीय जोकोभिच आर्थर ऐस स्टेडियमको कोर्टमा भएको फाइनलमा ६–३, ७–६ (७/५) र ६–३ ले विजयी रहे ।
सन् २०२१ को फाइनलमा भने मेडभेडेभले जोकोभिचलाई सिधा सेटमा हराएको थियो । यसक्रममा सर्बियाली खेलाडी एकै वर्ष चार ग्रान्ड स्लाम उपाधि जित्नबाट वञ्चित भएका थिए । जोकोभिचले मार्टरेट कोर्टको नाममा रहेको २४ ग्रान्ड स्लाम उपाधिको कीर्तिमान बराबर गरेका हुन् ।
