— अमेरिकी किशोर खेलाडी कोका गउफले एक सेटले पछाडि रहेको स्थिति उल्टाउँदै शनिबार बेलारुसकी आरयना साबलेन्कालाई पराजित गर्दै यूएस ओपन जितेकी छन् । उनले जितेको यो पहिलो ग्रान्ड स्लाम उपाधि हो ।
आर्थर ऐस स्टेडियम कोर्टमा उत्कृष्ट प्रदर्शन गर्ने क्रममा १९ वर्षीया गउफले २ घण्टा ६ मिनेट चलेको खेल २–६, ६–३ र ६–२ ले आफ्नो पक्षमा पारिन् । फाइनल अगाडि फ्लोरिडाकी गउफसामु दोस्रो वरीयताकी साबलेन्का उपाधिका लागि बलियो प्रत्याशी थिइन् । तर फाइनलमा कीर्तिमान २८ हजार १ सय ४३ दर्शक अगाडि गउफको प्रदर्शन निर्णायक रह्यो ।
जुलाईमा मात्रै गउफ विम्बल्डनको पहिलो चरणबाटै बाहिरिएकी थिइन् । त्यसपछि भने उनले वासिङ्टन तथा सिनसिनाटीमा उपाधि जितेकी थिइन् र आफ्नो खेल जीवनलाई ठोस दिन सकेकी थिइन् । उपाधिपछि गउफले भनिन्, ‘यो सफलताले मेरो जीवनमा धेरै महत्त्व राख्नेछ । जितपछि म आफैं भने केही हदसम्म स्तब्ध जस्तै छु ।’
गत वर्ष उनी फ्रेन्च ओपनको फाइनलमा पराजित भएकी थिइन् । गउफले थपिन्, ‘पछिल्लो पटक फ्रेन्च ओपनको फाइनलमा पराजित हुँदा मेरा लागि त्यो हृदयविदारक थियो । त्यसैले पनि आजको जित अझ विशेष भएको छ ।’ उनी यूएस ओपन जित्ने तेस्रो अमेरिकी किशोर खेलाडी पनि भएकी छन् । यसअघि ट्रेसी अस्टिन र सेरेना विलियम्सले किशोरी छँदै यूएस ओपन जितेका थिए । उपाधि जितेयता उनले आफ्नो प्रतिभाप्रति शंका गर्नेलाई पनि धन्यवाद दिइन् ।
उनले ठट्यौली पारामा भनिन्, ‘इमान्दारितापूर्वक भन्दा मैले ती सबैलाई धन्यवाद दिर्नै पर्छ, जसले मलाई कहिले पनि विश्वास गरेनन् । जसले मलाई विश्वास गरिरहेका थिएनन्, तिनीहरूले मलाई अझ राम्रो खेल्न प्रेरित गरिरहेका थिए । त्यसैको परिणाम आज आएको छ ।’ अर्कोतर्फ उपविजेतामा सीमित रहेकी साबलेन्काले आफ्नो हारको कारण आफ्नै भूल जिम्मेवार रहेको दाबी गरिन् । उनको भनाइ थियो, ‘मैले आफूविरुद्ध आफैं खेलें जस्तो लाग्छ ।’
गउफबारे बोल्दै उनले भनिन्, ‘आजको खेलमा उनी निकै प्रभावशाली रहिन् । दोस्रो सेट पुग्दा म सायद धेरै सोचिरहेकी थिएँ, त्यसपछि त मैले आफ्नो पकड खेलबाट गुमाउँदै गएँ । त्यसको फाइदा उठाएर गउफले अझ राम्रो खेलिन् भने मैले भूलमाथि भूल गर्दै गएँ ।’ खेलको पहिलो गेममै गउफ आत्तिएको देखिएको थियो र साबलेन्काले सजिलै उनको सर्भिस ब्रेक गरिन् । त्यस स्थितिबाट साबलेन्काले तुरुन्तै २–० को अग्रता लिएकी थिइन् ।
केही उतारचढावपछि पहिलो सेट साबलेन्काको नाममा रह्यो । यस्तोमा उनी केही तनावमा देखिइन् र तुरुन्तै दोस्रो सेटमा ३–१ ले पछाडि परिन् । अन्तिम तथा निर्णायक सेटमा पनि गउफले २–० को अग्रता लिएपछि पछाडि फर्केर हेर्नु परेन । गउफले सन् २ं०१९ को विम्बल्डनमा राम्रो प्रदर्शन गरेपछि धेरैले उनलाई भविष्यका खेलाडीका रूपमा गणना गर्न थालेका थिए । तर धेरैको अपेक्षाअनुसार उनको प्रदर्शन रहेन र उनको खेलको सबैभन्दा ठूलो विशेषता नै एकपरूपता नभएको प्रदर्शन रहेको थियो ।
