— नेपाल उद्योग परिसंघले १६ औं योजना तर्जुमा गर्दा आन्तरिक उत्पादन, आयात प्रतिस्थापन र रोजगारी सिर्जनालाई प्राथमिकतामा राख्न सुझाव दिएको छ । परिसंघले १६औं योजना तर्जुमा गर्दा प्राथमिकतामा राख्नुपर्ने विषयमा गरेको अध्ययनसहितको प्रतिवेदन आइतबार आयोगका उपाध्यक्ष मिनबहादुर श्रेष्ठलाई बुझाएको हो ।
परिसंघका अध्यक्ष राजेशकुमार अग्रवालले १६औं योजना औद्योगिक विकासमा केन्द्रित गराउनका लागि एकीकृत औद्योगिक विकास रणनीति बनाउनुपर्ने, उद्योगहरुका लागि जग्गाको सिलिङ तोक्न नहुने व्यवस्था गर्न र आन्तरिक उत्पादनलाई प्राथमिकता दिन 'मेक इन नेपाल स्वदेशी अभियान' प्रवर्द्धन गर्न सुझाव दिएको छ ।
त्यस्तै स्तरीय पूर्वाधार विकासका लागि न्यून बोलकबोललाई आधार मानेर आयोजना दिन नहुने, सीमा क्षेत्रमा हुने अवैध कारोबारलाई नियन्त्रण गरिनुपर्ने, नेपालको निर्यात प्रवर्द्धन गर्न विभिन्न मुलुकसँग दोहोरो करमुक्ति सम्झौता गर्नुपर्ने, रोजगारमूलक सीप विकासलाई उच्च प्राथमिकतामा राख्न परिसंघले सुझाएको छ ।
परिसंघको सुझाव ग्रहण गर्दै आयोगका उपाध्यक्ष श्रेष्ठले १६औं योजना उत्पादन, उत्पादकत्व र रोजगारीमा केन्द्रित हुने बताए । उत्पादन बढेमात्रै आयात प्रतिस्थापन गर्न र निर्यात बढाउन सकिने भएकाले आगामी योजना यसमै केन्द्रित हुने उनको भनाइ छ ।
