— अञ्जन विष्ट नेपालका लागि सर्वाधिक गोलको कीर्तिमान बराबरी गर्नबाट शुक्रबार चुकेका छन् । उनको त्यही असफलताका कारण नेपालले अन्तर्राष्ट्रिय मैत्रीपूर्ण खेलमा शुक्रबार म्यानमारसँग गोलरहित बराबरी खेल्नुपरेको छ । खेलको ६३ औं मिनेटमा नेपाललाई पेनाल्टीको अवसर प्राप्त भएको थियो ।
म्यानमारका डिफेन्डर फ्यो विनले आफ्नो बक्समा बल ह्यान्ड गरेपछि नेपालले पेनाल्टीको अवसर पाएको थियो । तर, त्यसमा अञ्जनले गरेको प्रहारलाई विपक्षी गोलरक्षक जित फ्योले गोल हुन दिएनन् । उनले त्यसमा नेपाललाई अग्रता दिलाउन सकेको भए हरि खड्का र नीराजन रायमाझीको नाममा रहेको १३ गोलको कीर्तिमानसँग बराबरी हुन्थ्यो ।
उनी म्यानमारविरुद्ध गोल गर्ने पहिलो नेपाली खेलाडी पनि हुन सक्थे । त्यसलाई छाडेर यांगुनको थुउन्ना रंगशालामा भएको खेल दुवै टिमले केही अवसर सिर्जना गरे पनि गोल भने हुन सकेन । खेलको अधिकांश समय म्यानमार भने नेपालमाथि हाबी रह्यो । दोस्रो हाफमा नेपालको प्रदर्शन धेरै हदसम्म फितलो रह्यो ।
यसै खेलबाट नेपालका लागि जिलेप्सीजंग कार्की र हिसुब थपलियाले डेब्यु गरेका छन् । आर्मीका जिलेप्सीले सुरुआती ११ मै परेका थिए । जावलाखेल युथका हिसुब सब्स्टिच्युट खेलाडीका रूपमा मैदान प्रवेश गरेका थिए । उनले अञ्जन विष्टलाई सब्स्टिच्युट गरेका थिए । नेपाल र म्यानमारबीचको यो चौथो अन्तर्राष्ट्रिय खेल हो ।
यसअघिका सबै तीन खेलमा नेपाल पराजित थियो । नेपालले म्यानमारलाई बराबरीमा रोकेको यो पहिलोपल्ट हो । लाओसविरुद्ध अर्को महिना हुने एसियाली विश्वकप तथा एसिया कप छनोटको तयारीकाक्रममा नेपाली टोली दुई मैत्रीपूर्ण अन्तर्राष्ट्रिय खेलका लागि म्यानमार गएको हो । अब दोस्रो खेल सोमबार हुनेछ ।
