— अमेरिकी किशोरी कोको गउफले मौसमलाई लिएर भइरहेको प्रदर्शनको बाधाबीच बिहीबार यूएस ओपन टेनिसको फाइनल यात्रा तय गरेकी छन् । उनले अब उपाधि भिडन्तमा बेलारुसकी अर्यना सबालेन्काको सामना गर्नेछिन् ।
सबालेन्काले भने कठिन जित निकाल्दै आफ्नो दोस्रो ग्रान्ड स्लाम उपाधि जित्ने सपना कायम राखिन् । गउफले पहिलोपल्ट ग्रान्ड स्लामको फाइनल प्रवेशका लागि चेक गणतन्त्रकी दसौं वरीयताकी क्यारोलिन मुचोभालाई ६–४, ७–५ ले पराजित गरिन् ।
विरोधबीच दोस्रो सेटमा ४९ मिनेट खेल रोकिएको थियो । त्यसमा १९ वर्षीया गउफले आफूलाई मानसिक रूपमा दरिलो राखिन् । आर्थर एस स्टेडियममा वातावरण समर्थक कार्यकर्ताले प्रदर्शन गरेका थिए । प्रदर्शनकारीलाई हटाएपछि फेरि खेल सुरु भएको थियो । त्यसमध्ये चार प्रदर्शनकारीलाई प्रहरीले समातेको छ । फेरि खेल सुरु भएयता गउफले कडा चुनौती सामना गर्नुपरे पनि उनको प्रदर्शन फाइनल पुग्न पर्याप्त रह्यो ।
जितपछि अमेरिकी किशोरीले प्रदर्शनकारीप्रति आफ्नो सहानुभूति रहेको बताइन् । उनले भनिन्, ‘मौसम परिवर्तनका कारण भइरहेको समस्यामा हामीले धेरै सुधार गर्न सक्छौं । यस्तो विरोध खेलका क्रममा नभएको भए हुन्थ्यो, तर प्रदर्शनकारीविरुद्ध म छैन । म खेलमा ६–४, १–० को स्थितिमा थिएँ, त्यही बेला विरोध सुरु भयो । यही प्रदर्शनकारीलाई लाग्छ कि यस्तै बेला विरोध गरे धेरै सुन्छन् भने मलाई केही भन्नु छैन ।’
पछिल्लो समय ठुल्ठूला खेल महोत्सवमा वातावरण समर्थक कार्यकर्ताले प्रदर्शन गर्दै आएकी छन् । विम्बल्डन र फ्रेन्च ओपनका क्रममा पनि विरोधका कारण खेल रोकिएका छन् । गउफ सन् १९९९ यता यूएस ओपनको फाइनल पुग्ने सबैभन्दा कान्छी अमेरिकी खेलाडी भएकी छन् । त्यसअघि यस्तै उपलब्धि सेरेना विलियम्सले हात पारेकी थिइन् । फाइनल शनिबार हुनेछ । उनले दोस्रो वरीयताकी खेलाडी सबालेन्काको सामना गर्नेछ ।
बेलारुसकी २५ वर्षीया सबालेन्का अहिले उच्च लयमा छिन् । उनी प्रतियोगितापछि निस्कने वरीयतामा विश्व नम्बर एक खेलाडी हुनेछिन् । यसअघिका शीर्ष वरीयताका खेलाडी इगा स्वाटिक प्रतियोगिताबाट बाहिरिएपछि सबालेन्का अगाडि जाने भएकी हुन् । तर, उनको जित भने सजिलो रहेन । यसका लागि कडा संघर्षबीच पुनरागमन विजय रच्नुपरेको थियो । उनले २ घण्टा ३२ मिनेट चलेको खेलमा अमेरिकाकी १७ वर्षीया म्याडिसन केयसलाई ०–६, ७–६ (७/१), ७–६ (१०/५) ले हराइन् ।
‘जसरी मैले हारको स्थितिबाट आफूलाई जितसम्म दोहोर्याएँ, त्यस प्रदर्शनमा मलाई गर्व छ । यो जित वास्तवमै अद्वितीय रह्यो,’ सबालेन्काले भनिन्, ‘मैले खेलका क्रममा आफूलाई प्रतिस्पर्धामा कायम राख्न प्रयास गरिरहें । मैले थप केही राम्रो गर्न कडा मिहिनेत पनि गरें ।’ उनले पहिलो सेटमा नचिताउने गरेर खराब सुरुआत गरेकी थिइन् । दोस्रो सेटमा उनी एक समय ५–४ ले पछाडि थिइन् । तर, अस्ट्रेलियन ओपनको पनि विजेता रहेका खेलाडी सबालेन्काले हार मानिनन् ।
उनले थपिन्, ‘हामी दुवैले टाइब्रेकमा ठीकै खेल्यौं । विशेषतः मैले चारैतर्फ अगाडि पछाडि गर्दै खेलें ।’ हारपछि केयस भने स्वाभाविक रूपमा स्तब्ध देखिएन र आफूलाई आँसु झार्नबाट रोक्न पनि सकिनन् । उनले भनिन्, ‘मैले खेलमा आफूले सक्दो खेलें । सायद कोही पनि खेलाडीले गर्न सक्ने भनेकै यति हो । मलाई टेनिस खेल्नुमै खुसी लाग्छ । जसरी म पराजित भएँ, त्यसमा दुःख त हुन्छ नै ।’ उनी दोस्रोपल्ट यूएस ओपनको फाइनल नजिक पुगेर पनि रोकिएकी हुन् ।
