— रुस-युक्रेन युद्धको विषयमा जी-२० का सदस्य राष्ट्रहरूबीच एकै खालको धारणा नहुँदा साझा वक्तव्य नआउने आशंकाबीच आयोजक तथा अध्यक्ष देश भारतले भने घोषणापत्र लगभग तयार भइसकेको जनाएको छ ।
शिखर सम्मेलनको पूर्वसन्ध्यामा नयाँ दिल्लीमा आयोजित पत्रकार सम्मेलनमा भारतका तर्फबाट जी-२० मा नेगोसिएसनमा रहेका शेर्पा अमिताभ कान्तले घोषणापत्र तयार रहेको र नेताहरुबाट अनुमोदन मात्रै बाँकी रहेको दाबी गरेका हुन् । उनले घोषणपत्र समावेशी, महत्वाकांक्षी र धेरै दृष्टिकोणबाट निर्णायक हुने बताए । उनले घोषणापत्र वैश्विक दक्षिण(ग्लोबल साउथ) र विकासशील देशहरुको आवाज बोल्ने उल्लेख गरे ।
उनले शिखर सम्मेलनको सम्पूर्ण तयारी पूरा भइसकेको र शनिबार बिहानैबाट नेताहरुको बैठक सुरु हुने पनि बताएका छन् ।
जी-२० बैठकमा अमेरिका, यूरोपियन युनियनसहितका देशहरु रुस युक्रेनको युद्धको सन्दर्भ उठाएर जी-२० को मञ्चबाट रुसलाई घेर्न खोजेका छन् । तर, रुस र चीन त्यसको विरोधमा छ । भारत पनि रुसको विरोधमा जी-२० को मञ्चलाई प्रयोग हुन नदिने मनसाय देखाउँदै आएको छ । जी-२० का हरेक सदस्यसँग भिटो पावर रहेको भन्दै भारतीय अधिकारी कान्तले हरेक मुद्दामा सबै देशलाई सर्वसम्मत गराउनु चुनौतिपूर्ण रहेको उनले बताए । हरेक एक देशलाई एकमत बनाउन र एकसाथ ल्याउन प्रयास गरिएको उनले बताए ।
मुख्य रुपमा युद्धकै विषयमा कायम विमतिहरूले साझा वक्तव्य नआउने हो कि भन्ने आशंकाहरु गरिएको हो । रुस र चीनका राष्ट्रपति दिल्लीको शिखर सम्मेलनमा आएका छैनन् । अध्यक्षराष्ट्र भारतको प्रस्तावमा जी-२० मा अफ्रिकी संघलाई सामेल गराउने विषयमा सहमति जुटिसकेको छ । भारतको प्रस्तावमा सबै सदस्यहरुले समर्थन जनाइसकेको र त्यसले सम्मेलनबाट औपचारिक रुप लिने बताइएको छ ।
भारतले शिखर सम्मेलनका क्रममा 'वसुधैव कुटुम्बकम' अर्थात विश्व एक परिवार हो भन्ने सन्देश जी-२० सम्मेलन मार्फत दिन चाहेको कान्तले बताए । यद्यपि भारतको यस नारालाई लिएर चीनले असन्तुष्टि जनाएको छ ।
जी-२० का सदस्य राष्ट्रका प्रमुखहरु दिल्ली आउने क्रम शुक्रबार बिहानैदेखि छ । शनिबार र आइतबार (सेप्टेम्बर ९ र १०) का दिन विश्वभरका शक्तिशाली नेताहरु दिल्लीमा रहने छन् । इटलीका प्रधानमन्त्री जांर्जियो मेलोनी, बेलायतका प्रधानमन्त्री ऋषि सुनक, जापानका प्रधानमन्त्री फुमियो किशिदा, अर्जेन्टिनाका राष्ट्रपति अल्बर्टो फर्नाडिज दिल्ली आइपुगेका छन् । अमेरिकाका राष्ट्पति जो बाइडेन साँझ अवतरण गर्दैछन् ।
शिखर सम्मेलन हुने प्रगति मैदानमा अत्याधुनिक र व्यस्थित अन्तर्राष्ट्रिय मिडिया सेन्टर बनाइएको छ । जहाँबाट विश्वभरबाट र भारत भित्रैबाट गरी ३ हजार पत्रकारले समाचार सम्प्रेषणको अनुमति पाएका छन् ।
