— नेपाल आईसीसी वुमेन्स ट्वान्टी–२० विश्वकप छनोटको सेमिफाइनलमा थाइल्यान्डसँग ४६ रनले पराजित भएको छ । जितका लागि १ सय ६ रनको लक्ष्य पाएको नेपालले १९.३ ओभरमा सबै विकेट गुमाएर ५९ रन मात्र बनाउन सक्यो ।
हारले नेपालको वेमेन्स ट्वान्टी–२० विश्वकपको ग्लोबल छनोट खेल्ने सपना समाप्त भएको छ । मलेसियामा भएको खेलमा नेपालका सुरुआत कमजोर रह्यो र टिमले आठ रन बनाउँदासम्म चार विकेट गुमाइसकेको थियो ।
नेपालका लागि कविता जोशीले १०, अप्सरी बेगमले १० तथा कविता कुँवरले १७ रन बनाए । कविताको प्रदर्शन मात्र केही उल्लेखनीय रह्यो । उनले २० बलको सामना गरेर दुई चौका पनि प्रहार गरिन् ।
यसअघि टस हारेर पहिले ब्याटिङको निम्तो पाएको थाइल्यान्डले २० ओभरमा दुई विकेट गुमाएर १ सय ५ रन बनाएको थियो । त्यसमा नानपाट कोन्चारोएनकाइले उत्कृष्ट अर्धशतक बनाउने क्रममा ५९ रन बनाइन् र नटआउट रहिन् ।
उनले ६३ बलको सामना गरेर चार चौका पनि प्रहार गरिन् । यस्तै, नथाकन चन्थमले ३१ र चनिदा सुतिरुआङले नटआउट ११ रन बनाए । दोस्रो विकेटका लागि कोन्चरोएनकाइ र चन्थमले ६८ रनको साझेदारी गरे । नेपाली बलरमध्ये कविता कुँवर र पूजा महतोले एक एक विकेट लिए ।
