। आयातमा कमी र वैदेशिक मुद्रा आर्जन गर्ने प्रमुख स्रोत रेमिट्यान्समा भएको उल्लेख्य वृद्धिले बाह्य क्षेत्र सबल बन्दै गएको छ । चालु आर्थिक वर्षको पहिलो महिना साउनमा नै विदेशी विनिमय सञ्चित करिब ३४ अर्बले बढेर १५ खर्ब ७३ अर्ब १२ करोड पुगेको छ ।
२०८० असार मसान्तमा १५ खर्ब ३९ अर्ब ३६ करोड रहेको विदेशी विनियम सञ्चिति २.२ प्रतिशतले बढेको नेपाल राष्ट्र बैंकले जनाएको छ ।
अमेरिकी डलरको तुलनामा नेपाली मुद्रा लगातार कमजोर बन्दै गर्दा नेपाली रुपैयाँमा विदेशी मुद्राको सञ्चित बढ्दै गएपनि अमेरिकी डलरमा पनि सञ्चित बढ्दै गएको छ । साउनमा विदेशी विनियम सञ्चिति ११ अर्ब ८५ अमेरिकी डलर पुगेको राष्ट्र बैंकले जनाएको छ । असारमा ११ अर्ब ७१ करोड रहेकोमा १ महिनामा १.२ प्रतिशतले बढेको हो । २०८० साउन मसान्तको कुल विदेशी विनिमय सञ्चितिमा भारतीय मुद्राको अंश २१.९ प्रतिशत रहेको छ ।
नेपाल राष्ट्र बैंकले विदेशी मुद्राको दबाब बढ्दै गर्दा २०७८ पुसपछि विदेशी मुद्रामा कडाइ गरेको थियो । तर, पछिल्लो समय वैदेशिक भ्रमणमा जानेदेखि आयात गर्न एलसी खोल्दा पाउने सुविधा समेत ढाएको छ । तर, पनि विदेशी विनियम सञ्चिति भने बढ्दै गएको छ ।
आयातमा संकुचन कायम रहेको र विदेशि मुद्रा सञ्चिति बढ्दै जाँदा सञ्चिति पर्याप्तता सूचकमा पनि उल्लेख्य सुधार देखिएको छ । चालु आर्थिक वर्ष २०८०/८१ को साउन महिनाको आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चितिले १२.५ महिनाको वस्तु आयात र १०.३ महिनाको वस्तु तथा सेवाको आयात धान्न पर्याप्त हुने राष्ट्र बैंकले जनाएको छ ।
२०८० साउन मसान्तमा विदेशी विनिमय सञ्चितिको कुल गार्हस्थ्य उत्पादनसँगको अनुपात २९.२ प्रतिशत, कुल आयातसँगको अनुपात ८५.७ प्रतिशत, विस्तृत मुद्रा प्रदायसँगका अनुपातहरु २६.३ प्रतिशत रहेको छ ।
२०८० असार मसान्तमा कुल गार्हस्थ्य उत्पादनसँगको अनुपात २८.६ प्रतिशत, कुल आयातसँगको अनुपात ८३ प्रतिशत, विस्तृत मुद्रा प्रदायसँगका अनुपातहरु २५.१ प्रतिशत थियो ।
