— नेपालले १९ औं एसियाली खेलकुदमा सहभागी जनाएको खेलमध्ये सबैभन्दा खराब प्रदर्शन रग्बीको रह्यो । नेपाली पुरुष रग्बी टिमको प्रदर्शन कस्तो रह्यो भने यसले चीन यात्रामा कुनै न्याय गर्न सकेन ।
रग्बीमा नेपालको सबैभन्दा खराब प्रदर्शन
एकपछि अर्को खेलमा एकपक्षीय हार बेहोरेको रग्बी टिमको प्रदर्शन प्रतियोगितामा सहभागिताका लागि छेउछाउ पनि नरहेको देखियो ।
आफ्नो अन्तिम खेलमा नेपाली टिम श्रीलंकाली खेलाडीसम्मिलित ओसीए टिमसँग ६८–० ले पराजित रह्यो । समूह चरणको मात्र नभएर वरीयताका लागि भएका सबै खेलमा नेपालको हार अविश्वसनीय ढंगले एकपक्षीय थियो । सहभागी १३ टिममध्ये नेपाल सबैभन्दा पुछारमा रह्यो । नेपालले कुल ६ खेल खेलेकामा एकै खेलमा मात्र अंक बटुल्न सफल रहेको हो ।
यूएईसँग ५५–७ ले पराजित भएयता नेपाली टोली चीनसँग ६५–०, अफगानिस्तानसँग ४१–०, फिलिपिन्ससँग ५५–० र थाइल्यान्डसँग ३६–० ले हारेको थियो ।
जुडो
जुडोमा नेपाली खेलाडीको यात्रा मंगलबार सकिएको छ । अन्तिम दिन दुई खेलाडीले चुनौती पेस गरेकामा दुवै सजिलै पराजित भए । जियोसन लिन्पु जिम्न्याजियममा पुरुष १०० केजीमाथि नेपालका रन्जेश गोल इप्पोनका आधारमा पराजित भए । उनलाई प्रिक्वाटरफाइनलमा काजकिस्तानका क्रिकबे गालिमजानले १ मिनेट ७ सेकेन्डमा हराए ।
महिला ७८ केजीमाथि नेपालकी आकृति जोशी उज्वेकिस्तानकी रिनिता इल्माटोभासँग इप्पोनकै आधारमा पराजित भइन् । प्रिक्वाटरफाइनलमा आकृति २७ सेकेन्ड टिक्न सकिन ।
तेक्वान्दो
तेक्वान्दोको लिनान स्पोर्ट्स कल्चर एन्ड एक्जिविसन सेन्टरमा भएको खेलमा नेपालका गोविन्दबहादुर आलेले पुरुष ६३ केजीमुनि अन्तिम ३२ को खेल जिते पनि अन्तिम १६ मा पराजित भए । उनले टिमोर लिस्टेका जोस दा कोस्टा सिल्भालाई रेफ्री स्टप कन्टेस्टका आधारमा पराजित गर्दै प्रिक्वाटरफाइनल पुगे । त्यस चरणमा उनी थाइल्यान्डका बानलुङ टुबतिम्दाङसँग २–० ले पराजित भए ।
महिला ५३ केजीमुनि अन्तिम १६ को खेलमा नेपालकी आयशा लामा दक्षिण कोरियाकी हाइजिन पार्कसँग २–० अंकले पराजित भइन् । महिलाकै ५७ केजीमुनि अन्तिम १६ को खेलमा सन्ध्याकुमारी सिंह पनि पराजित भइन् । यसअघि तेक्वान्दोका चार खेलाडी बाहिरिइसकेका छन् ।
स्क्वास
स्क्वासतर्फ महिला र पुरुष दुवै टिम पराजित रह्यो । महिलामा नेपाल मलेसियासँग सोझो सेटमा ३–० ले पराजित भएको हो । पुरुषमा नेपालमाथि कुवेत ३–० ले विजयी रह्यो ।
पौडी
पौडीको महिला १०० मिटर फ्रिस्टाइलतर्फ नेपालकी अनुसिया तण्डुकार हिट चरणबाटै बाहिरिन् । हाङचउ स्पोर्ट्स सेन्टरस्थित पौडी पोखरीमा उनी आफ्नो हिटमा तेस्रो भएकी थिइन् ।
अनुसियाले निर्धारित दूरी एक मिनेट ०३.१७ सेकेन्डमा पूरा गरिन् । कुल ३० खेलाडीले प्रतिस्पर्धा गरेकामा उनी २५ औं स्थानमा रहिन् ।
टेनिस
टेनिसको मिक्स्ड डबल्समा नेपालका सुनीरा थापा र प्रनव खनालको जोडीले फिलिपिन्सका एलेक्स र फ्रान्सिस कासेविरुद्धको खेल २–० को सिधा सेटले गुमाएको थियो । फिलिपिन्सका खेलाडीले नेपाली जोडीलाई केवल ३८ मिनेटमै पराजित गरे । पहिलो र दोस्रो सेट समान ६–० ले नेपाली टोली पराजित भएको हो ।
उसु
उसुमा निमा घर्तीमगर नान क्वानतर्फ आफ्नो समूहको १० औं स्थानमा रहिन् । निमाले समग्रमा १८.८४ स्कोर गरिन् । उनले नान क्वानमा ९.३९ र नान्डो अलराउन्डमा ९.४५ स्कोर गरेकी थिइन् ।
पुरुषतर्फ दीपक हमाल आफ्नो समूहमा १३ औं स्थानमा रहेका छन् । उनले समग्रमा १९.१७ स्कोर बटुलेका थिए । दीपकले नान क्वानमा ९.६३ र नानगुन अलराउन्डमा ९.४५ स्कोर गरेका थिए ।
बक्सिङ
पुरुष बक्सिङमा नेपालका बुद्ध ग्याम्जो लामा पराजित भएका छन् । ५७ केजी तौल समूहको अन्तिम ३२ को खेलमा उनी भियतनामका भान डुयोङ एनगुएनसँग अंकका आधारमा ४–० ले पराजित भएका छन् ।
