— अस्ट्रेलियाको दोस्रो ठूलो राज्य भिक्टोरियाका प्रिमियर ड्यानियल एन्ड्रुजले राज्य प्रमुख (प्रिमियर) को पदबाट राजीनामा दिएका छन् । मंगलबार अचानक राजीनामा घोषणा गर्दै उनले आफू तथा परिवारलाई थप समय दिनका लागि पदबाट राजीनामा दिएको जनाएका छन् । उनले प्रिमियरका साथै राज्यको लेबर पार्टीको नेता र निर्वाचित क्षेत्रको सांसदबाट समेत राजीनामाको घोषणा गरेका हुन् ।
अस्ट्रेलियाली राजनीतिमा एक सक्षम र निडर प्रिमियरको छवी बनाएका एन्ड्रुज भिक्टोरिया राज्यको संसद्मा दुई दशकभन्दा लामो समयदेखि क्रियाशील थिए । उनी सन २०१० देखि उक्त राज्यको लेबर पार्टीको नेताका रुपमा चयन भएका थिए भने तीन कार्यकालसम्म भिक्टोरिया राज्यको प्रिमियरका रुपमा जिम्मेवारी सम्हाल्ने अवसर पाएका थिए । उनको नेतृत्वमा गतवर्ष भएको निर्वाचनमा लेबरले पुन: जित हासिल गर्दै सरकार निर्माण गर्न सफल भएको थियो । जम्मा ५१ वर्षका एन्ड्रुज स्थानीय सांसदका रुपमा सन् २००२ मा निर्वाचित भएका थिए ।
भिक्टोरियामा मंगलबार दिउँसो पत्रकार सम्मेलन गर्दै उनले राज्यका जनतालाई लामो समयसम्म सेवा गर्न पाएकोमा आफू गौरवान्वित भएको बताए । आफ्नी श्रीमतीसहित उपस्थित उनले भोलि बुधबार साँझ ५ बजेबाटै कार्यलय छाड्ने बताएका छन् । उनले प्रिमियर पदबाट राजीनामा दिएसँगै परिवारसँग थप समय बिताउने र आफ्नो लागि समय व्यतित गर्ने जनाएका छन् । यदि कोही आफ्नो कामको भारबाट सहज महसुस गर्दैन भने उसले उक्त पद छोड्नु जायज हुने उनको भनाइ छ । उनी लेबर पार्टीबाट सबैभन्दा लामो समयसम्म प्रिमियर हुने राज्यका नेताका रुपमा समेत चिनिन्छन् ।
सन् २०१४ मा उनको नेतृत्वमा सरकारमा आएको लेबर पार्टीले सन २०२६ सम्मका लागि राज्यको नेतृत्व पाएको छ । तर उनले तेस्रो कार्यकालका लागि नेतृत्वमा आएको एक वर्षपछि नै प्रिमियरको पदबाट राजीनामा दिएका हुन् । उनले आफ्नो पार्टी नेतृत्वका साथै आफू निर्वाचित मूलग्रेभ निर्वाचन क्षेत्रको सांसद पदबाट समेत राजीनामा दिने पत्रकार सम्मेलनमा बताए । राज्यको प्रिमियर तथा पार्टी नेतृत्वका लागि लेबर पार्टीले बुधबार दिउँसोसम्ममा निर्णय गर्ने सञ्चारमाध्यमले जनाएका छन् । उनले मंगलबार नै राज्यका गर्भनर जनरल समक्ष आधिकारिक रुपमा आफ्नो राजीनामा प्रस्तुत गर्ने कार्यक्रम रहेको जनाइएको छ ।
