— नेपालको १९ औं एसियाली खेलकुदअन्तर्गत महिला फुटबलमा दोस्रो चरण प्रवेशको सम्भावना सोमबार सकिएको छ । समूह ‘डी’ को खेलमा नेपाल लगातार दोस्रो खेलमा पराजित भएपछि आफ्नो अन्तिम खेलअघि नै प्रतियोगिताबाट बाहिरिएको हो । वेनचउमा भएको खेलमा महिला विश्वकप पूर्वविजेता जापानले नेपाललाई ८–० ले हराएको हो ।
त्यसमा हायाते आसावाले दुई गोल गरिन् । जापान महिला विश्व फुटबलको महाशक्ति हो । नेपाल यसअघि भियतनामसँग २–० ले पराजित भएको थियो । यो समूहबाट जापान र भियतनाम नकआउट चरण पुगेका छन् भने नेपालसँगै बंगलादेश प्रतियोगिताबाट बाहिरिएको छ । यसअघि बंगलादेश अर्को खेलमा भियतनामसँग ६–१ ले हारेको थियो ।
नेपालले आफ्नो अन्तिम खेलमा बंगलादेशको सामना गर्नेछ । समूह विजेताको निर्णयका लागि जापानले भियतनामविरुद्ध खेल्नेछ ।
तेक्वान्दो
लिनान स्पोर्ट्स कल्चर एन्ड एक्सिविसन सेन्टरमा भएको महिला ४९ केजीमुनि अञ्जली तामाङ अन्तिम १६ मा रोकिएकी छन् । उनले पहिलो चरणमा कम्बोडियाकी लिडेन क्रिलाई पराजित गरिन् । पहिलो राउन्डमा ७–७ को बराबरी खेलेकी अञ्जलीले दोस्रो राउन्ड १०–४ ले जितिन् । प्रिक्वाटरफाइनलमा भने उनी थाइल्यान्डकी पानिपक वोङपातान्कितसँग १२–० र १०–० ले पछि परिन् । यसअघि पुरुष ५८ केजीमुनि नेपालका राहुल कुमाल पहिलो चरणमा साउदी अरबियाका नासिर अहमदी रियादसँग ४–१२ र २–० ले हारे ।
बास्केटबल
महिला थ्री बाइ थ्री बास्केटबलमा नेपाल बलियो टोली जापानको हातबाट सजिलै पराजित भयो । डिक्वान जियोग्राफिक इन्फर्मेसन पार्कमा भएको समूह ‘बी’ को खेलमा जापानले २२–४ स्कोरको जित निकालेको हो । नेपालले बुधबार काजकिस्तान र शुक्रबार चाइनिज ताइपेईको सामना गर्नेछ ।
पौडी
पौडीतर्फ एलेक्जेन्डर शाह र डुवाना लामा दुवै हिट चरणबाट बाहिरिएका छन् । हाङचउ स्पोर्टस सेन्टरमा पुरुष ५० मिटर फ्रिस्टाइलमा एलेक्जेन्डरले २४.१५ सेकेन्डमा दूरी पूरा गरे । डुवानाले भने महिला २०० मिटर फ्रिस्टाइलमा १ मिनेट ५८.९० सेकेन्डको समय निकालिन् ।
फेन्सिङ
नेपाली खेलाडी फेन्सिङमा जितविहीन रहेका छन् । पुरुष हाब्रे व्यक्तिगत स्पर्धामा प्रयास योञ्जन र राजेन्द्र गजुरेल तथा महिला फोयल व्यक्तिगततर्फ मन्दिरा थापा आफूले खेलेका सबै खेलमा पराजित भएका छन् ।
जुडो
जुडोमा प्रतिस्पर्धामा उत्रेका तीन खेलाडी सबै पराजित भए । नेपालका मनिता श्रेष्ठ प्रधान, जंगबहादुर सारु र पुनम श्रेष्ठ इप्पोनका आधारमा पराजित भए । महिला ५७ केजीमुनि मनिता तुर्कमेनिस्तानकी मायसा पार्दायेभा र ७५ केजीमुनि पुनम मंगोलियाकी इड्रेना नयम बात्सुरीसँग पराजित भए । पुरुष ८१ केजीमुनि फिलिपिन्सका भिरोन जोन फेरेरले जंगबहादुरलाई हराए ।
साइक्लिङ
साइक्लिङमा नेपालका सुरज रानामगर र उषा खनाल सोमबार निर्धारित दूरी तय गर्न असफल रहे । दुवैले माउन्टेन बाइक क्रसकन्ट्रीमा प्रतिस्पर्धा गरेका थिए । यससँगै साइक्लिङमा नेपालको चुनौती टुंगिएको छ । पुरुष २५.५ किमि दूरी तय गर्नेक्रममा सुरज दोस्रो ल्यापमा घाइते भए । महिला २०.५६ किमि दूरीमा प्रतिस्पर्धा गर्दागर्दै उषालाई ‘हाइपर थर्मिया’ भएको थियो ।
उसु
एक्सएसजी स्पोर्ट्स सेन्टरमा भएको उसुको थाउलोअन्तर्गत महिला छान छ्वानमा नेपालकी सुस्मिता तामाङ ११ खेलाडीमध्ये आठौं स्थानमा रहिन् । उनले ९.४१० अंक जोडिन् । थाउलोकै पुरुष ताजिक्वानमा नेपालका पासाङ शेर्पा १८ खेलाडीमा अन्तिममा रहे । उनले ९.०१३ अंक स्कोर गरे । अर्को स्पर्धा ताइजिजियानमा प्रतिस्पर्धा गरेका पासाङ १८ खेलाडीमध्ये १७ औं स्थानमा रहे । उनले ८.९७३ अंक ल्याए ।
रग्बी
नेपाली रग्बी सेभेनमा जितविहीन हुँदै बाहिरिएको छ । नेपाल आफ्नो अन्तिम दुई खेलमा फिलिपिन्ससँग ५५–० र थाइल्यान्डसँग ३६–० गोलले पराजित रह्यो ।
