। अन्ततः १४८ औं दिनमा आएर हलिउड लेखकहरुको हड्ताल टुंगिएको छ । राइटर्स गिल्ड अफ अमेरिका (डब्लुजीए)ले बुधबार वक्तव्य जारी गर्दै युनियनका नेताहरुले हड्ताल अन्त्य गर्न र प्रतिबन्धको आदेश हटाउने निर्णयमा सर्वसम्मत रुपमा मतदान गरेको जनाएको छ ।
हड्ताल टुंगिएपछि संस्थामा आबद्ध ११ हजार ५०० सदस्यले तलब सुविधा वृद्धि गर्ने र कृत्रिम बौद्धिकता (एआई)बाट संरक्षण गर्नको लागि तीन वर्ष लामो सम्झौतालाई अनुमोदन गर्ने कि नगर्ने भन्ने बारेमा मतदान गर्नेछन् ।
कलाकारको हड्ताल भने यथावत छ ।
गत मे २ देखि सुरु भएको लेखकको हड्ताललाई हलिउडलाई सर्वाधिक असर तुल्याउने दशककै लामो हड्तालको रुपमा अर्थ्याइएको छ । लेखकले तलब सुविधामा वृद्धि र कृत्रिम बौद्धिकता (एआई)को मुद्दालाई लिएर हड्ताल गरिरहेका थिए ।
मिल्कन इन्स्टिच्युटका अर्थशास्त्री केभिन क्लाउडेनको अनुमान अनुसार यसले अमेरिकी अर्थतन्त्रलाई करिब ५ बिलियन डलरको क्षति पुगेको छ । लेखकको हड्तालले लोकप्रिय अमेरिकी टिभी श्रृंखलाको उत्पादन र प्रसारण समेत रोकिएको थियो ।
साताको प्रारम्भमा लेखकले आफूहरु स्टुडियोसँग मोटामोटी सहमतिको नजिक पुगेको बताएका थिए । अमेरिकी राष्ट्रपति जो बाइडेनले पनि सहमतिको नजिक पुगेको कुराप्रति चासो जनाउँदै शुभकामना दिएका थिए ।
तर पनि लेखकको हड्ताल अन्त्यले हलिउडलाई सामान्य अवस्थामा भने फर्काउँदैन । किनकि जुलाईदेखि कलाकार पनि हड्तालमा छन् । लेखकजस्तै कलाकारले पनि ज्याला, कामको अवस्था, स्वास्थ्य र पेन्सन सुविधाको सुधारको माग गरिरहेका छन् ।
भविष्यमा फिल्म र टेलिभिजन कार्यक्रम निर्माणको क्रममा कृत्रिम बौद्धिकता (एआई)बाट संरक्षणको माग पनि उनीहरुको छ । लेखकको हड्ताल गर्न तयार पारिएको मस्यौदाले कलाकारलाई पनि सहमति जुटाउन सजिलो हुने अनुमान गरिएको छ ।
