— १९ औं एसियाली खेलकुदमा पदकको आस गरिएकी नेपालकी बक्सिङ खेलाडी सुष्मा तामाङ बुधबार पहिलो चरणमै पराजित भएकी छन् । महिला ५० केजीको अन्तिम १६ को भिडन्तमा सुष्मा काजकिस्तानकी नाजम काइजाईसँग अंकका आधारमा ५–० ले चुकिन् ।
गत वर्ष यू–२२ एसियाली बक्सिङ च्याम्पियनसिपमा रजत पदक जितेकी सुष्मासँग विश्व च्याम्पियनसिप खेलेको अनुभव पनि छ ।
पुरुष ६३.५ केजी तौल समूहमा १३ औं दक्षिण एसियाली खेलकुदका स्वर्णधारी भूपेन्द्र थापा चाइनिज ताइपेइका चु इन लाइसँग अंकका आधारमा ४–० ले पराजित भए । पहिलो चरणमा बाइ पाएका भूपेन्द्र सोझै प्रिक्वाटरफाइनलमा पुगेका थिए । नेपालका अर्का बक्सर रविन नेपाल अन्तिम १६ चरणमा फिलिपिन्सका जोन नोबेल मार्भिनसँग दोस्रो राउन्डमा आरएससीका आधारमा पराजित भए ।
पौडी : पौडीमा बुधबार प्रतिस्पर्धा गरेका नेपालका डुवाना लामा र नासिर हुसैन हिट चरणबाटै बाहिरिएका छन् । महिला १०० मिटर ब्रेस्टस्ट्रोकमा पहिलो हिटमा प्रतिस्पर्धा गरेकी डुवाना सातौं स्थानमा रहिन् । उनले निर्धारित दूरी तय गर्न १ मिनेट २०.१५ सेकेन्ड लगाइन् । हिटमा ७ खेलाडीले प्रतिस्पर्धा थिए । डुवाना यसअघि महिला २०० सय मिटर फ्रिस्टाइलमा पनि हिट चरणबाटै बाहिरिएकी थिइन् ।
पुरुष २०० मिटर फ्रिस्टाइल स्पर्धामा दोस्रो हिटमा प्रतिस्पर्धा गरेका नासिरले निर्धारित दूरी २ मिनेट ००.१४ सेकेन्डमा पार गरे । ८ खेलाडी सहभागी हुँदा हिटमा उनी सातौं भए ।
बास्केटबल : महिला थ्री बाई थ्री बास्केटबलमा नेपालले लगातार दोस्रो खेलमा पराजित भएको छ । समूह ‘बी’ को लिग खेलमा नेपाल कजकिस्तानसँग १७–१० स्कोरले हार्यो । काजकिस्तानविरुद्ध नेपालबाट कप्तान श्रेया खड्का र मीना गुरुङले ४–४ स्कोर जोडे । नेपालको स्कोरबोर्डमा गरिसा सिलवाल र रिन्छेन मोक्तानले १–१ अंक थपे । समूह चरणको पहिलो खेलमा जापानले नेपाललाई २२–४ अंकले हराएको थियो । नेपालले समूहको अन्तिम खेलमा शुक्रबार चाइनिज ताइपेईको सामना गर्नेछ ।
जुडो : जुडोमा नेपालको चुनौती बुधबार समाप्त भएको छ । मिक्स टिम इभेन्टमा पनि पराजय बेहोरेसँगै नेपालको चुनौती समाप्त भएको हो । व्यक्तिगत स्पर्धामा नेपालको चुनौती मंगलबार सकिएको थियो । जिओसान लिन्पु जिम्न्याजियममा बुधबार मिक्स टिम इभेन्टको क्वाटरफाइनलमा नेपाली टिम जापानसँग ४–० ले पराजित भयो ।
टिम इभेन्टमा प्रतिस्पर्धा गरेका नेपालका जंगबहादुर सारु जापानका गोकी ताजिमासँग पराजित भए । आकृति जोशी रुरी ताकाहासी, रन्जेश गोले ह्योगा ओता र मनिता श्रेष्ठ प्रधान मोमो तामाओकीसँग सहजै पराजित भए । पराजित टिमबीच हुने रिपिचेज प्रतिस्पर्धामा पनि नेपाल कजकिस्तानसँग ४–० ले नै पछि पर्यो । यस इभेन्टको स्वर्ण जापानले उज्वेकिस्तानलाई हराएर जित्यो ।
ह्यान्डबल : महिला ह्यान्डबलमा नेपाल बुधबार जापानसँग पराजित भएको छ । समूह ‘बी’ अन्तर्गत जेजियाङ नर्मल युनिभर्सिटी जिओसान जिम्न्याजियममा नेपाली टिम जापानसँग ६२–१० गोलले पराजित भयो । पहिलो हाफमा ६ गोल गरेको नेपालले दोस्रो हाफमा ४ गोल गरेको थियो । समूह चरणको पहिलो खेलमा नेपाल आयोजक चीनसँग ५७–१० ले पराजित भएको थियो । एसियाडको महिला ह्यान्डबलमा नेपालको यो पहिलो सहभागिता हो ।
तेक्वान्दो : तेक्वान्दोमा नेपालबाट ११ खेलाडी सहभागी भएकामा बुधबारसम्म १० खेलाडीको चुनौती सकिसकेको छ । बुधबार ३ खेलाडीले प्रतिस्पर्धा गरेका थिए । नेपालका अभिषेक बराल पुरुष ८० केजी तौल समूहको अन्तिम ३२ मा अफगानिस्तानका ओमिद साहकसँग २–० अंकले पराजित भए । अभिषेक साहकसँग पहिलो चरणमा ११–१ र दोस्रो चरणमा १५–२ ले पछि परे ।
पुरुष ६८ केजीमुनि वीरबहादुर महरा अन्तिम १६ मा चाइनिज ताइपेईका यी जुई चिउविरुद्ध २–० ले नै पराजित भए । पहिलो चरणमा १०–० ले पछि परेका वीरबहादुरले दोस्रो चरणमा केही सुधार गरे पनि १२–८ ले पछि परे । १३ औं सागका स्वर्णधारी वीरबहादुर र उसुकी निमा घर्तीमगरले उद्घाटन समारोहमा नेपालको झन्डा बोकेका थिए ।
महिला ६७ केजीमुनि इन्दिरा बस्नेत अन्तिम १६ को प्रतिस्पर्धा इरानकी मेलिका मिरहोसेनी भाकिलीविरुद्ध २–० ले निराश भइन् । उनले पहिलो राउन्ड १४–१ र दोस्रो राउन्ड ९–० ले गुमाइन् । अब पुरुष ८० केजीमा ज्याकी यादवले बिहीबार जोर्डनका खेलाडीसँग खेल्नेछन् ।
उसु : उसुमा नेपालकी कविता थापा महिला जियान्सु/कुन्सु अलराउन्डमा समग्रमा ११ औं स्थानमा रहिन् । बुधबार जियोसन गुआली स्पोर्ट्स सेन्टरमा कविताले जियान्सुमा ९.६३३ र कुन्सुमा ९.२४३ गरी कुल १८.८७६ अंक जोडिन् ।
स्क्वास : स्क्वासको पुरुष टिम इभेन्टको समूह ‘ए’ मा नेपालप् ीटिम कतार र सिंगापुरसँग ३–० को सोझो सेटमा पराजित भयो । महिला टिम इभेन्टको समूह ‘बी’ मा नेपाली टिम भारत र पाकिस्तानसँग हार्यो । नेपाल दुवै टिमसँग समान ३–० को नतिजामा पछि पर्यो ।
टेबलटेनिस : टेबलटेनिसको पुरुष एकलमा नेपालका रुविन महर्जन माल्दिभ्स र संयोग कपाली यमनका खेलाडीसँग पराजित भए ।
