: नेपालले पदकको आशा राखेको बक्सिङका दुई खेलाडी सुष्मा तामाङ र भूपेन्द्र थापा मगरले पहिलो चरणमै हारको सामना गरेका छन्। हाङचाओ जिम्नेजियम हलमा बुधबार भएको खेलमा सुष्मा काजकिस्तानकी नज्यम काजइबेइसँग पराजित भएकी हुन्।
महिला ५० केजीमुनिको तौल समूहअन्तर्गत अन्तिम १६ को उक्त खेलमा सुष्माले कुनै पनि बेला विपक्षी खेलाडीलाई दबाबमा राख्न सकिनन्। नज्यमले एकपक्षीयले रुपमा ५–० नतिजा आफ्नो पक्षमा पारिन्। गत वर्ष यू–२२ एसियन बक्सिङ च्याम्पियनसिपमा रजत पदक जितेकी सुष्माबाट नेपालले पदकको आशा राखेको थियो। उनीसँग विश्व च्याम्पियनसिप समेत खेलेको अनुभव छ।
यसैगरी बुधबार नै भएको पुरुष ६३ केजीमुनिको तौल समूहको खेलमा भूपेन्द्रले पनि पराजय बेहोरेका हुन्। चाइनिज ताइपेईका इन चु लाईसँगको अन्तिम १६ को उक्त भिडन्तमा भूपेन्द्र ४–० ले पराजित भए। अर्को खेलमा फिलिपिन्सका जोन नोवेल मार्भिनसँग नेपालका रोविन नेपालले पराजय बेहोरे।
यसअघि संगीता सुनार, दीपक श्रेष्ठ, मीनु गुरुङ, विनिता थापा मगर, दीपेश लामा, बुद्ध ग्याम्जो लामा र आशिष दुवाडीले हार बेहोरिसकेका छन्।
पुरुष ५१ केजीमुनिको तौल समूहको अन्तिम १६ को खेलमा रविन थापाले भने जित हात पारेका थिए। रविनले इन्डोनेसियाका दियो कोएबानुलाई ४–१ अंकले पराजित गरेका थिए। रविनले प्रिक्वार्टरफाइनलमा उत्तर कोरियाका चोनयोङ सालाइसँग प्रतिस्पर्धा गर्ने छन्। बक्सिङमा रविनसँगै अब तीन खेलाडीले प्रतिस्पर्धा गर्न बाँकी छ।
