— हाङचउ एसियाली खेलकुदमा पदक आशा गरेको ई–स्पोर्ट्सको पब्जी मोबाइल प्रतिस्पर्धामा नेपाली टोली दोस्रो चरणमा पुगेको छ । चीनको हाङचउ ई–स्पोर्ट्स सेन्टरमा भएको प्रारम्भिक चरणमा नेपाल समूह ‘सी’मा उत्कृष्ट दोस्रो हुँदै अघिल्लो चरणमा पुगेको हो ।
समूहमा नेपालसहित दक्षिण कोरिया, मंगोलिया र भियतनाम छन् । नेपाल उत्कृष्ट टाइममा दोस्रो भएको हो । समूहको शीर्षस्थानमा दक्षिण कोरिया रह्यो । नेपालको ५२ मिनेट २०.२८ सेकेन्ड तथा कोरियाको ४७ मिनेट २८.४६७ सेकेन्डको टाइमिङ रह्यो । नेपाल चार समूहमा दोस्रो हुनेमध्ये उत्कृष्ट टाइमिङको आधारमा अन्तिम १६ मा छनोट भएको हो ।
अब दोस्रो चरणमा नेपालले शुक्रबार प्रतिस्पर्धा गर्नेछ । उत्कृष्ट आठ टोली तेस्रो चरणमा प्रवेश गर्नेछन् । पहिलो चरणमा समूह ‘ए’ बाट हङकङ, ‘बी’ बाट चाइनिज ताइपेई, ‘सी’ बाट दक्षिण कोरिया र नेपाल तथा ‘डी’ बाट इन्डोनेसिया दोस्रो चरणमा पुगेका हुन् । वरीयताका आधारमा चीनसहित चार देश दोस्रो दोस्रो चरणमा पुगेका छन् । समूहबाट सिधै दोस्रो चरण पुग्न नसकेका ११ टोलीबीचको प्रतिस्पर्धाबाट सात टोली अन्तिम १६ मा पुग्नेछन् ।
टेबलटेनिस
नेपालकी नम्बर एक महिला खेलाडी नविता श्रेष्ठ एसियाडअन्तर्गत टेबलटेनिसको अन्तिम ३२ मा पराजित भएकी छन् । उनले प्रिक्वाटरफाइनल पुग्नका लागि भारतकी मनिका वत्रासँग प्रतिस्पर्धा गरेकी थिइन् । त्यसमा उनी ४–० ले पराजित भइन् । मनिकाले नवितालाई ११–५, ११–४, ११–३, ११–२ ले हराइन् । महिला एकलमा नेपालकी सिक्का सुवाल श्रेष्ठ जापानकी मिउ हिरानोसँग ४–० सेटले हारिन् । सिक्काले ११–७, ११–१, ११–४, ११–५ ले खेल गुमाइन् ।
फेन्सिङ
फेन्सिङमा नेपाल क्वाटरफाइनलबाटै बाहिरिएको छ । नेपालले सेमिफाइनल प्रवेशका लागि जापानसँग प्रतिस्पर्धा गरेको थियो । स्वर्ण पदक दावेदार जापानले नेपाललाई एकपक्षीय खेलमा ४५–१० स्कोरले हरायो ।
बक्सिङ
बक्सिङमा सहभागी नेपाली खेलाडीको खराब प्रदर्शन जारी नै रह्यो । हाङचउ जिम्न्याजियम हलमा पुरुष ५१ केजी तौल समूहमा नेपालका रविन थापा पराजित भएका छन् । उनी उत्तर कोरियाका सो चोयोङसँग अंकका आधारमा ५–० ले पराजित भए । रविन र चोयोङबीच तीन राउन्डसम्म प्रतिस्पर्धा चल्यो । तीनै चरणमा नेपालका रविनले उत्तर कोरियाली खेलाडीलाई चुनौती दिन सकेनन् । खेलका ५ जर्जले उत्तर कोरियाका चोयोङलाई पुरै १० स्कोर दिएका थिए । नेपालका रविनले सबै जर्जबाट तीन चरणमा ९ स्कोर पाए ।
ब्याडमिन्टन
ब्याडमिन्टनमा नेपालको पुरुष टिम इभेन्टका खेलाडी क्वाटरफाइनल पुगेका छन् । नेपालले पुरुषमा मंगोलियालाई ३–१ सेटले हराउँदै अन्तिम आठको स्थान पक्का गरेको हो । नेपालका प्रिन्स दाहाल र सुनील जोशीले जित निकाले भने विष्णु कटुवाल पराजित भए । प्रिन्स र विष्णुको जोडीले डबल्समा भने जित निकालेको थियो । महिला टिममा नेपाल माल्दिभ्ससँग ३–१ ले पराजित भयो । नेपालका रसिला महर्जन, नङसल तामाङ पराजित भए भने अनुमाया राईले जित हात पारिन् । डबल्समा रसिला र अनुमायाको जोडी पराजित भयो ।
स्क्वास
स्वाक्समा बिहीबार नेपाली टिम भारतीय टोलीसाग ३–० ले पराजित भएको छ । सिंगल्समा अमृत थापामगरले भारतका अभय सिंहसागको खेल ११–२, ११–४, ११–१ ले गुमाए । अरहन्तकेशर सिंह भारतीय महेश मान्गोनकरसाग ११–२, ११–३, ११–३ ले पराजित भएपछि टोलीले २–० को अग्रता लियो । तेस्रो खेलमा अमिर ब्लोन भने हरिन्दर पाल सिंहसाग ११–१, ११–२, ११–६ ले पराजित भए ।
पौडी
पौडीतर्फ नेपालकी अनुसिया तण्डुकार हिट चरणबाटै बाहिरिइन् । महिला ५० मिटर फ्रिस्टाइलमा उनले २९.५३ सेकेन्डमा दूरी पूरा गरेकी थिइन् । हिट एकमा प्रतिस्पर्धा गरेकी अनुसिया तेस्रो स्थानमा रहे पनि समग्रमा २६औं स्थानमा रहिन् ।
गल्फ
गल्फको व्यक्तिगत स्पर्धामा बिहीबार पार ७२ को वेस्टलेक गल्फ कोर्समा शुक्रबहादुर राईले दुई अन्डर ७० को प्रदर्शन गरे । उनी समग्रमा ३१ औं स्थानमा छन् । नेपालले पदक आस गरेका सद्भाव आचार्यले एक अन्डर ७१ र सुवास तामाङले इभन पार ७२ मा पहिलो दिनको खेल सके । सद्भाव ३८ औं र सुवास ४७ औं स्थानमा छन् । दुई ओभर ७४ खेलेका युवराज भुजेल ५८ औं स्थानमा छन् ।
महिलामा सुष्मा सिग्देल १६ ओभर ८८ स्कोरसहित समग्रमा ३६ औं स्थानमा छन् । २० ओभर ९२ खेलेकी कश्मिरा शाह समग्रमा ३८ औं स्थानमा छिन् । महिलातर्फ ३९ खेलाडी प्रतिस्पर्धी हुँदा शीर्षस्थानमा रहेकी जापानकी बाबा साकी ७ अन्डर ६५ स्कोर छ ।
