— नेपालले १९ औं एसियाली खेलकुदको ई–स्पोर्टसअन्तर्गत पिस एलिट पब्जी मोबाइलमा शुक्रबार सेमिफाइनल यात्रा तय गरेको छ । एलिमिनेट चरणको समूह ‘सी’ मा दोस्रो भएर नेपाल सेमिफाइनल पुगेको हो ।
नेपालका लागि सुबिनकुमार प्रजापति, दिपेश गुरुङ, साहस भण्डारी र समिर गुरुङले चुनौती पेस गरेका थिए । नेपालको समूहमा हङकङ पहिलो भयो । प्यालेस्टाइन र साउदी अरेबिया भने यस समूहबाट बाहिरिएका छन् । अब नेपालले शनिबार सेमिफाइनल खेल्नेछ । यसमा दोस्रो स्थान प्राप्त गरे नेपाल फाइनलमा स्थान बनाउने छ ।
फाइनलमा पुगे पनि नेपालको पदक सम्भावना निश्चित हुने छैन । स्वर्ण पदकको भिडन्तमा चार टोलीबीच प्रतिस्पर्धा हुनेछ । त्यसमा शीर्ष तीनभित्र रहे मात्र पदक जित्ने छ ।
समूह ‘ए’ बाट दक्षिण कोरिया र थाइल्यान्ड, समूह ‘बी’ बाट आयोजक चीन र चाइनिज ताइपेई तथा समूह ‘डी’ बाट जापान र इन्डोनेसिया सेमिफाइनल पुगेका छन् ।
अब चार समूहबाट आएका शीर्ष दुई–दुई गरी आठ टोलीलाई दुई समूहमा विभाजन गरेर सेमिफाइनल खेलाइने छ । सेमिफाइनलका दुवै समूहमा चार–चार टोली हुनेछन् । समूहका शीर्ष दुई टोली फाइनल पुग्नेछन् ।
एथलेटिक्स
महिला १० हजार मिटर दौडमा नेपालकी सन्तोषी श्रेष्ठ शुक्रबार छैटौं स्थानमा रहिन् । कुल आठ खेलाडीसम्मिलित दौडमा सन्तोषीले ३८ मिनेट ४०.१५ सेकेन्डको समय निकालिन् । त्यस स्पर्धामा बहराइनकी भिओला मोटोसिओलोले ३१ मिनेट ४३.७३ सेकेन्डको समयमा स्वर्ण पदक जितिन् । सन्तोषी १३ औं सागकी स्वर्ण विजेता धाविका हुन् । उनले ३५ मिनेट ०७.३४ सेकेन्डको व्यक्तिगत उत्कृष्ट टाइमिङलाई एसियाडमा सुधार्न सकिनन् ।
सोमबहादुर कुमालले पुरुष ४ सय मिटर दौड ४८.६८ सेकेन्डमा पूरा गरे । दोस्रो हिटमा सहभागी सातमध्ये उनी पाँचौं भए । उनले दक्षिण कोरिया र किर्गिस्तानका धावकलाई पछि पारे । कुल २० प्रतिस्पर्धीले दुरी पार गर्दा सोमबहादुर १७ औं स्थानमा रहे । सोमले एसियाडको तयारी प्रशिक्षणका दौरान नै डेंगु लागेका कारण प्रदर्शन राम्रो नभएको बताए ।
गल्फ
गल्फमा पार ७२ को वेस्ट लेक इन्टरनेसनल गल्फ कोर्समा भएको पुरुष व्यक्तिगत स्पर्धामा शुक्रबहादुर राईबाहेक अन्य खेलाडीले अघिल्लो चरणमा स्थान बनाउन सकेनन् ।
दोस्रो दिन शुक्रबार तीन अन्डर ६९ खेलेका शुक्रको कुल ३६ होलमा ५ अन्डर १ सय ३९ स्कोर छ । पहिलो शुक्रले दुई अन्डर ७० को कार्ड बनाएका थिए । उनी समग्रमा २९औं स्थानमा रहादै फाइनल चरणलाई छानिए ।
पदक आशा गरिएका सद्भाव आचार्य र सुवास तामाङको प्रदर्शन भने सोचे जस्तो रहेन । समग्रमा इभन पार १ सय ४४ खेलेका सुवास र २ ओभर १ सय ४६ को कार्ड बनाए सद्भाव व्यक्तिगत स्पर्धाबाट बाहिरिए । अर्का प्रतिस्पर्धी युवराज भुजेल समग्रमा ११ ओभर १ सय ५५ कार्ड बनाएर बाहिरिए । नेपाल एसियाड गल्फको पुरुष र महिला टिम स्पर्धाबाट पनि बाहिरिएको छ । महिलातर्फ टिम स्पर्धामा नेपालकी सुष्मा सिग्देल र कश्मिरा शाहले ३६ होलमा समग्रमा ६६ ओभर ३ सय ५४ स्कोर खेले ।
दोस्रो दिन शुक्रबार कश्मिराले ११ ओभर ८३ र सुष्माले १६ ओभर ८८ खेलेकी थिइन् । महिला टिम स्पर्धामा नेपाल १३ औं भयो । १४ टोली सहभागी टिम इभेन्टमा नेपालले मंगोलियालाई पछि पार्यो । पुरुषतर्फ हङकङका खो ताइची २१ अन्डर १ सय २२ स्कोरसहित शीर्षस्थानमा छन् ।
ब्याडमिन्टन
ब्याडमिन्टनको पुरुष टिम स्पर्धामा नेपालको यात्रा शुक्रबार क्वाटरफाइनलमै सीमित रह्यो । भारतले नेपाललाई सजिलै हराएको हो । बिनजियाङ जिम्न्याजियममा भएको खेलमा नेपालका तीनै खेलाडी एकपक्षीय ढंगले पराजित भए । भारतका लक्ष्य सेनले प्रिन्स दाहाललाई २१–५, २१–८ ले हराए । श्रीकान्त किदाम्बीले सुनिल जोशीलाई २१–४, २१–१३ ले पन्छाए । तेस्रो तथा अन्तिम खेलमा मन्जुनाथ मिथुनले विष्णु कटुवाललाई २१–२, २१–७ ले हराए । यसअघि नेपालले मंगोलियालाई हराएर क्वाटरफाइनल यात्रा तय गरेको थियो ।
बास्केटबल
महिला थ्री बाई थ्री बास्केटबलमा नेपाल सबै खेलमा पराजित भएको छ । जिओग्राफिम इन्फर्मेसन पार्क बास्केटबल कोर्टमा भएको समूह ‘बी’ को अन्तिम खेलमा नेपाल चाइनिज ताइपेईसँग २२–२ स्कोरको फराकिलो अन्तरले पराजित भयो ।
नेपालबाट कप्तान श्रेषा खड्का र मीना गुरुङले १–१ स्कोर गरे । यसअघि नै जापान र काजकिस्तानसँग पराजित नेपाल लगातार तेस्रो हारपछि समूह चरणबाटै बाहिरिएको छ । नेपाल पहिलो खेलमा जापानसँग २२–४ ले पराजित भयो । दोस्रो खेलमा काजकिस्तानसँग नेपाली टिम १७–१० स्कोरले हारेको हो ।
पौडी
पौडीमा नेपालबाट एसियाडमा सहभागी सबै खेलाडी हिट चरणबाटै बाहिरिएका छन् । शुक्रबार नेपालका नासिर हुसेन हिट चरणबाटै बाहिरिए । हाङचउ ओलम्पिक स्पोर्ट्स सेन्टर एक्वाटिक एरिनामा पुरुष ४०० मिटर फ्रिस्टाइलमा नासिरले निर्धारित दूरी ४ मिनेट २२.०२ सेकेन्डमा पूरा गरे । उनी आफ्नो हिटमा चौथो भए । समग्रमा भने उनी २५ सहभागीमध्ये २२ औं स्थानमा रहे ।
यसअघि नासिर २०० मिटर फ्रिस्टाइलमा पनि हिट चरणबाटै बाहिरिएका थिए । नासिरको स्पर्धापछि पौडीमा नेपाली खेलाडीको चुनौती सकिएको छ । पौडीमा नेपालबाट चार खेलाडीले ८ इभेन्टमा प्रतिस्पर्धा गरेका थिए । नेपालका कुनै पनि खेलाडीले हिट चरण पार गर्न सकेनन् ।
बक्सिङ
बक्सिङको महिला ५७ केजीमुनिको तौल समूहमा नेपालकी चन्द्रकला थापा शुक्रबार पहिलो चरणमै पराजित भइन् । अन्तिम १६ को प्रतिस्पर्धामा उनी थाइल्यान्डकी पोनटिप बुपासँग अंकका आधारमा ५–० ले हारिन् ।
महिला ७५ केजीमुनि तौलमा सरस्वती रानाले पहिलो खेलमा बाइ पाएकी छन् । सरस्वती भियतनामकी ली डिएम क्विन्हविरुद्ध क्वाटरफाइनल जितिन् भने कांस्य पदककी हकदार हुनेछिन् । इन्चोन एसियाड खेलेकी सरस्वतीले १२ औं सागकी कांस्य विजेता हुन् ।
ह्यान्डबल
ह्यान्डबलमा नेपाली महिला टोली उपाधि दाबेदार हङकङसँग समूह ‘बी’ को खेलमा २७–१८ ले पराजित भयो । नेपालले हङकङलाई पहिलो हाफमा रोक्न सकेन । दोस्रो हाफमा भने नेपाली महिला खेलाडीले सुदृढ प्रदर्शन गर्दै हङकङलाई कडा चुनौती दिएको थियो । दोस्रो हाफमा नेपाल १३–१२ ले मात्र पछाडि परेको थियो ।
