— तस्कारहरूले चाडबाडलाई लक्ष्य गरेर काठमाडौंको बजारमा अवैध रूपमा भारतीय सामान भित्र्याउन सिरहा नाका रोजेको भेटिएको छ । यस नाका भएर भारतबाट पछिल्लो दुई दिनमा अवैध रूपमा झन्डै डढ करोड रुपैयाँ बराबरको कपडा बरामद भएको छ ।
राजस्व अनुसन्धान कार्यालय इटहरीले सशस्त्र प्रहरी बलको सहयोगमा सिरहास्थित माडर नजिकैबाट काठमाडौं लैजाँदै गरेको ट्रकसहित आइतबार बिहान झन्डै एक करोडको कपडा बरामद गरेको छ । पछिल्लो समय चोरी–पैठारी हुन थालेको सुराकीका आधारमा प्रहरी परिचालन गरिएको राजस्व कार्यालयका प्रमुख सुरेश आचार्यले जनाए । सारी, कुर्ता–सुरुवाल, सर्टिङ–सुटिङलगायत कपडा बरामद गरिएको उनको भनाइ छ । राजस्वको सुराकीका आधारमा गोलबजारस्थित सशस्त्र प्रहरीले कपडाको ट्रक नियन्त्रणमा लिएको हो ।
सिरहाको माडरस्थित एक विद्यालय परिसरको आँपबगैंचा नजिकैबाट शनिबार बिहान पनि झन्डै ५० लाखको कपडा बरामद गरिएको राजस्व अनुसन्धान विभागका महानिर्देशक नवराज ढुंगानाले जनाएका छन् । यसरी दुई दिनमा करिब डेढ करोडको सामान बरामद गरेको उनको भनाइ छ । उक्त कपडा पनि बगैंचामा थुपारिएको अवस्थामा फेलापरेको उनले बताए ।
दसैंमा भारतीय कपडाको खपत काठमाडौंमा बढी हुने भएकाले खुला सीमाको फाइदा उठाएर चोरी–पैठारी बढेको महानिर्देशक ढुंगानाको दाबी छ । सीमा क्षेत्रका व्यक्तिले ससानो परिणाममा यस्ता सामान भित्र्याउने र एकै स्थानमा थुपारेर ठूलो परिमाण बनाउने गरेको प्रारम्भिक अध्ययनले देखाएको पनि उनले जनाए । नेपाल भित्र्याएपछि उक्त सामानलाई व्यवस्थित रूपमा प्याकिङ गरेर सवारीसाधनमा लोड गरेको राजस्व कार्यालयका प्रमुख आचार्यले बताए ।
बरामद सामानको नक्कली बिल पनि रहेको उनको भनाइ छ । पूर्व–पश्चिम राजार्गबाट करिब २३ किमि दक्षिणतर्फ रहेको सिरहा भन्सार नाका छलेर खुला बाटो चोरी–पैठारी हुने गरेको उनले जनाए । जिल्लाको करिब ४६ किमि भारतीय सीमामा जोडिएको छ । खुला सीमाका कारण ससानो परिणाममा सामान भित्र्याएर संकलन गर्ने प्रवृत्ति बढ्दो रहेको सिरहाका प्रमुख जिल्ला अधिकारी राजेन्द्रदेव पाण्डेले बताए । साइकल वा मोटरसाइकलमा विवाह, चाडबाड र व्यक्तिगत प्रयोजनका लागि भन्दै सामान भित्र्याउने गरिएको उनको भनाइ छ । खुला सीमा लामो भएकाले भन्सारले चाहेर पनि नियन्त्रण गर्न कठिन भएको उनले जनाए ।
