— पहिलो पटक एसियाली खेलकुदमा प्रतिस्पर्धा गर्न लागेको महिला कबड्डी टिमसामु सोमबार नेपाललाई पहिलो पदक दिलाउने सम्भावना रहेको छ । नेपालले आफ्नो समूहको खेलमा बंगलादेशको सामना गर्दै छ र त्यसमा जित निकाल्न सके कम्तीमा कांस्य पदक जित्ने निश्चित हुनेछ । महिला कबड्डीमा कुल सात टिमको सहभागिता रहेको छ ।
त्यसमध्ये समूह ‘ए’ मा चार टिम रहेका छन्, भारत, चिनियाँ ताइपेई, थाइल्यान्ड र दक्षिण कोरिया । समूह ‘बी’ मा भने नेपाल र बंगलादेशसँगै इरान रहेका छन् । कबड्डीमा तेस्रो स्थानका लागि थप खेल हुने छैन । नेपाल र बंगलादेशबीचको खेल स्थानीय समयअनुसार साढे दस बजे सुरु हुनेछ । त्यस अगाडि बंगलादेशले साढे आठको खेलमा इरानको सामना गर्नेछ ।
महिला कबड्डीमा नेपाल पछिल्लो दक्षिण एसियाली खेलकुदको रजत पदक विजेता पनि हो । नेपालले त्यस क्रममा बंगलादेशलाई हराएको थियो । नेपाली टिमका प्रशिक्षक पार्वती राई आफ्ना खेलाडीको आत्मविश्वास उच्च रहेको बताउँछिन् । भारतमा विशेष प्रशिक्षण लिएर टिम शनिबार चीन आइपुगेको हो ।
‘हामीले भारतमा राम्रो तयारी गरेका छौं । त्यसैले पनि हाम्रा खेलाडीको उच्च मनोबल रहेको छ । हामी बंगलादेशलाई हराउन सक्षम छौं,’ उनले भनिन् । नेपालले दक्षिण एसियाली खेलकुदमा महिलातर्फ अहिलेसम्म एक रजत र तीन कांस्य जितेको छ । यस्तोमा नेपाली खेलकुद इतिहासमै कबड्डीसामु अहिलेसम्मकै सबैभन्दा ठूलो ऐतिहासिक सफलता हात पार्ने अवसर रहेको छ ।
नेपाली टिममा कुल १२ खेलाडी रहेका छन् र उनीहरू हुन्, जयन्ती बडु, मनमती विष्ट, अर्पणा चौधरी, रविना चौधरी, गंगा घिमिरे, नीतु गुरुङ, कलावती पन्त, अनुजा राई, इशा राई, मेनुका राजवंशी, सुनीता थापा र सिर्जना थारू । नेपाललाई पदक दिलाउने सम्भावना भनिएका तीन खेलमध्ये तेक्वान्दो र बक्सिङको चुनौती समाप्त भएयता कबड्डीमा अप्रत्याशित सम्भावना तयार भएको हो ।
पदकको सम्भावना रहेको कराते टिम अझै चीन आइपुगेको छैन । कुल आठ टिम सम्मिलित कराते टिम भने मंगलबार हाङचउ आइपुग्नेछ । टिम पुगेयता मात्र प्राविधिक टिमको बैठक बस्ने र ड्र निकाल्ने काम हुनेछ । यी औपचारिक प्रक्रिया पूरा भएपछि मात्र करातेमा नेपालको सम्भावनाबारे भन्न सकिनेछ ।
त्यसबाहेक पुरुष क्रिकेटबाट पनि नेपालको पदकको सम्भावना कायम रहेको छ । नेपालले आइतबार माल्दिभ्सलाई हराएयता क्वाटरफाइनल यात्रा तय गरिसकेको छ । त्यस चरणको ड्र निकाल्न भने अझै बाँकी रहेको छ । नेपालले नकआउट चरणमा टेस्ट मान्यता कुनै टिमलाई हराउने हो भने पदकको सम्भावनाबाट गुज्रिनेछ ।
नेपाली क्रिकेट टिमका कप्तान रोहित पौडेलले आफ्नो टिमको एक मात्र मुख्य लक्ष्य भनेकै पदक जित्नु रहेको बताएका छन् । उनले भनेका छन्, ‘हाम्रो एक मात्र ध्यान भनेकै पदकमा केन्द्रित रहनु हो । हामीले पदक जित्न सके, त्यो नेपाली क्रिकेटका लागि पनि विशेष हुनेछ । ट्वान्टी–२० क्रिकेटमा सबै प्रकारका सम्भावना खुला छन् र हामी कुनै पनि टिमलाई हराउन सक्षम छौं ।’
उनले क्वाटरफाइनल अगाडि नेपालले दुई खेल खेलिसकेको स्थितिमा आफ्नो टिमलाई थप फाइदा पुग्ने मान्छन् । ‘हामी यहाँको वातावरण र पिचसँग केही हदसम्म अभ्यस्त भइसकेका छौं । त्यसैले पनि हामीले अझ राम्रो गर्न सक्ने आधार तयार भएको हो । फेरि हाम्रा खेलाडी पनि पदक सम्भावनालाई लिएर उत्साहित छन्,’ रोहितले भनेका छन् ।
