— ट्वान्टी–२० अन्तर्राष्ट्रिय क्रिकेटमा नेपालका लागि कसैले ६ विकेट लिएकै थिएनन् । अविनाश बोहराले आइतबार त्यो पनि पूरा गरे । उनको कीर्तिमानी सटीक बलिङ मद्दतले नेपालले माल्दिभ्सलाई १ सय ३८ रनले पराजित गर्यो । नेपाल समूह ‘ए’ को विजेताका रूपमा एसियाली खेलकुदको पुरुष स्पर्धाको नकआउट चरण पुगेको हो ।
नेपालले टस जितेर पहिले ब्याटिङको निर्णय गरेपछि खेलाडीले ब्याटिङ मात्र होइन, बलिङ अभ्यासको पनि राम्रै मौका पाए । अविनाशको धारिलो आक्रमण अगाडि पूरा माल्दिभ्सको टिम १९.४ ओभर मात्र टिक्यो र ७४ रन बनाउन सक्यो । अविनाशले ३.४ ओभरमा ११ रन मात्र खर्चे र छ विकेट लिए । उनी ह्याट्रिकको मौकाबाट भने चुके तर उनलाई यसमा गुनासो भने रहने छैन ।
उनले सबैभन्दा पहिले फरिद सिउसको विकेट लिए र त्यसपछि लगातार छाइरहे । उनले आफ्नो पहिलो ओभरमै तीन विकेट लिएका थिए । माल्दिभ्सका ब्याटरमध्ये मोहम्मद घानीले मात्र केही सदृढ प्रदर्शन गरे । उनले ३४ बलमा ३६ रन बनाए । उनले दुई चौका र दुई छक्का प्रहार गरे । त्यसबाहेक रसिद रसमले १२ र सिउसले १० रन बनाए । नेपालका लागि भने सोमपाल कामी, गुल्सन झा, सन्दीप लामिछाने र कुशल भुर्तेलले एक–एक विकेट लिए ।
त्यस अगाडि नेपालले २० ओभर उपयोग गर्दै सात विकेट गुमाएर २ सय १२ रन बनाएको थियो । नेपालका लागि कुशल मल्ल २० बलमा ४७ रन बनाएर अविजित रहे । टिमको स्कोरमा उनको भन्दा पनि कप्तान रोहित पौडेलको योगदान बढी रह्यो । उनले २७ बलमा ५२ रन बनाए । उनले पनि समान तीन चौका र छक्का प्रहार गरे । कुशल भुर्तेल र गुल्सनले समान ३५ रनको योगदान दिए । तेस्रो एसियाली खेलकुद खेलिरहेका विनोद भण्डारीको ब्याटबाट १३ रन निस्केको थियो । माल्दिभ्सको बलरमध्ये नजवान इस्माइलले तीन विकेट लिए ।
खेलपछि ट्वान्टी–२० विशेषज्ञ खेलाडी अविनाशले आफ्नो प्रदर्शनमा खुसी व्यक्त गरे । उनले भने, ‘ह्याट्रिक गर्न सकिएन, त्यो पनि पूरा भएको भए, अझ खुसी हुने थिएँ । नेपालका लागि पाँच विकेट लिने सपना थियो । आजको प्रदर्शनले म पुरानो लयमा फर्केको जस्तो लाग्छ । अब हाम्रोसामु राम्रो टिमविरुद्ध खेल्ने अवसर छ । म नेपाललाई पदक दिलाउन चाहन्छु । अबको यात्रा पक्कै पनि सजिलो भने हुने छैन । तर यहाँको पिचमा सबै प्रकारको सम्भावना खुला छन्, यो पिच सजिलो नै भन्ने छैन । त्यसैले म धेरै आशावादी छु ।’
तिलक ५२ औं स्थानमा
आर्चरीको पुरुष रेकुभ व्यक्तिगतमा नेपालका तिलक मगर प्रारम्भिक छनोट चरणमा ५२ औं स्थानमा रहे । पुरुषतर्फको प्रारम्भिक छनोटमा ८४ खेलाडीले प्रतिस्पर्धा गरेका थिए । तिलकले समग्रमा ६ सय ३४ स्कोर गरे । यस विधामा दक्षिण कोरियाका उसेओक ली ६ सय ९० स्कोरका साथ शीर्षस्थानमा रहे ।
महिलातर्फको कम्पाउन्ड व्यक्तिगत प्रदर्शनमा नेपालकी इमायुङ राई ४५ औं स्थानमा रहिन् । उनले ६ सय ४७ स्कोर गरेकी थिइन् । यस विधामा ५१ खेलाडीले भाग लिएका थिए । भारतकी ज्योति सुरेखा शीर्षस्थानमा रहेकी छन् । उनले सर्वाधिक ७ सय ४ स्कोर गरेकी थिइन् । रिक्यभको महिला व्यक्तिगत छनोटमा नेपालकी मञ्जु अमगाईं ७७ औं स्थानमा रहिन् ।
स्क्वासमा पनि निराशा
पुरुष एकलको स्क्वासका खेलमा आइतबार अमृत थापा र अरहन्ता सिंह पराजित भएका छन् । ओलम्पिक स्पोर्ट्स सेन्टरमा भएको अन्तिम ३२ को खेलमा कुवेतका अब्दुल्लाह अल्मिजेनले अमृतलाई ११–४, ११–२ र ११–५ ले हराए । यस्तै मलेसियाका मोहम्मद बिनले अरहन्तालाई ११–५, ११–३ र ११–३ ले पराजित गरे । यसअघि मिक्ड्स डबल्समा हङकङको यी लिन र सी हिमको जोडीले स्वस्थानी श्रेष्ठ र अमिर ब्लोनको जोडीलाई ११–१ र ११–३ ले पन्छायो ।
फूलमतीको प्रदर्शनमा सुधार
एथलेटिक्सअन्तर्गत महिला १५०० मिटरमा नेपालकी फूलमती रानाले आफ्नो व्यक्तिगत प्रदर्शनमा सुधार गरेकी छन् । ओलम्पिक सेन्टर स्टेडियमको ट्र्याकमा भएको स्पर्धामा फूलमतीले निर्धारित दूरी ४ मिनेट ३७.६४ सेकेन्डमा पूरा गरेकी हुन् ।
यसअघि उनले एसियन एथलेटिक्स च्याम्पियनसिपमा ४ मिनेट ४९.७२ सेकेन्डको समय निकालेकी थिइन् । यस विधामा राष्ट्रिय कीर्तिमान भने सरस्वती भट्टराईको नाममा छ । सरस्वतीले २०१६ मा रियो ओलम्पिकमा ४ मिनेट ३३.९४ सेकेन्डको कीर्तिमान बनाएकी थिइन् ।
