— वीरगन्ज महानगरपालिकामा डेंगी संक्रमण बढ्दै गएको छ । यस वर्ष साउनको अन्तिम सातादेखि आइतबारसम्ममा महानगरमा ५७ डेंगी रोगी देखिएका वीरगन्ज महानगर स्वास्थ्य महाशाखा प्रमुख अनिलकुमार यादवले जनाए ।
उनका अनुसार, साउनमा २, भदौमा ३८ र असोजमा १७ गरी कूल ५७ डेंगी रोगी फेला परेका हुन् । उनीहरु वीरगन्जका विभिन्न अस्पताल तथा चिकित्सकको सम्पर्कमा पुगेका छन् ।
पछिल्लो पटक नेसनल मेडिकल कलेज शिक्षण अस्पतालमा २ र एड्वान्स अस्पतालमा १ गरी नयाँ ३ डेंगी रोगी सम्पर्कमा आएका प्रमुख यादवले बताए । उनीहरु अस्पतालमै उपचारमा छन् ।
पछिल्लो समय वीरगन्जको श्रीपुर, बसपार्क, रेल्वे रोड, छपकैंया लगायतका स्थानबाट रोगी सम्पर्कमा आउन थालेकाले ती क्षेत्रमा लामखुट्टेको लार्भा नष्ट गर्न ‘सर्ट एण्ड डिस्ट्रोय’ अभियान सन्चालन गरिएको उनले बताए । अभियानको क्रममा हालसम्म ६ सयभन्दा बढी टायरबाट लामखुट्टेको लार्भा नष्ट गरी सकिएको उनले बताए ।
यसअघि महानगरमा सञ्चालित विभिन्न अस्पतालमै यो अभियान चलाउँदा कतिपय अस्पतालमा भण्डारण गरिएको टायर र खाली भाँडाकुँडाहरुमा समेत लामखुट्टेको लार्भा फेला पारेर नष्ट गरिएको उनले बताए । वर्षायाममा टायरको उचित व्यवस्थापन नहुँदा त्यसमै हुर्किने लामखुट्टेबाट डेंगी रोगको प्रकोप फैलिने खतरा हुने गरेको उनको भनाइ छ । गमला र एयर कन्डिसनमा जमेको पानीमा पनि डेंगीको लार्भा हुर्कने गरेकाले महानगरवासी सचेत हुनु पर्ने उनको सुझाव छ ।
हालसम्म सम्पर्कमा आएका रोगीहरुमा धेरै जटिल समस्या नरहेको उनले बताए । ‘हालसम्म यो रोगबाट मानवीय क्षतिको घटना भएको छैन, यस वर्ष त्यति धेरै जटिलता रोगीमा देखिएको पनि छैन,’ उनले भने, ‘धेरै बिरामीहरु चिकित्सकको सल्लाह र सम्पर्कमा रही घरमै बसेर पनि उपचार गराइरहेका छन् ।’
