— भारतले साफ यू–१९ फुटबल च्याम्पियनसिपको उपाधिमा ह्याट्रिक गरेको छ । भारतले शनिबार दशरथ रंगशालामा भएको फाइनलमा पाकिस्तानलाई ३–० ले पराजित गर्दै लगातार तेस्रो पटक दक्षिण एसियाली उमेर समूहको यो प्रतियोगिता जितेको हो ।
नेपालले सन् २०१५ र २०१७ मा गरी यो प्रतियोगिताको पहिलो दुई संस्करण जितेको थियो । त्यसयता भारतको वर्चस्व छ । भारतले २०१९, २०२२ र यसपालिसहित लगातार तेस्रो पटक ट्रफी जितेको हो ।
अन्तर्राष्ट्रिय फुटबलमा निलम्बन फुकुवा भएर आएको पाकिस्तानले पहिलो हाफमा दरो चुनौती तेर्स्याए पनि भारतले दोस्रो हाफमा अनुभवी खेल खेल्दै उपाधि जितलाई निरन्तरता दिएको थियो ।
दोस्रो हाफमा मैदानमा प्रवेश गरेका मंगलेथान किपगेनले खेलको नक्सा परिवर्तन गरिदिएका थिए । उनले २५ यार्ड टाढाबाट गरेको दर्शनीय प्रहारले पाकिस्तानका गोलरक्षक साहिल गुललाई कुनै मौका दिएको थिएन ।
किपगेनले नै ८५ औं मिनेटमा गरेको फ्रिकिक प्रहार पाकिस्तानी गोलरक्षकलाई जिल्याउँदै गोल भएको थियो । इन्ज्युरी टाइमको पाँचौं मिनेटमा किपगेनको क्रसमा गौतमसार गोरारीले हेडमा गोल गर्दै भारतलाई विजय बनाए । त्यसको अर्को मिनेटमा अली जाफरले दोस्रो पहेँलो कार्ड पाउँदै मैदान छाडेपछि पाकिस्तान १० खेलाडीमा सीमित भएको थियो ।
किपगेनले प्रतियोगितामा उत्कृष्ट खेलाडीको पुरस्कार पाए । भारतकै लायोनेल डारिल रिमेइ उत्कृष्ट गोलरक्षकमा चुनिए । नेपालका समिर तामाङ र भुटानका जिग्मे नामग्याल प्रतियोगिताको उच्च स्कोर बने । दुवैले समान ३–३ गोल गरेका थिए । भुटानलाई फेयर प्ले अवार्ड प्रदान गरिएको थियो ।
भारतले सेमिफाइनलमा नेपाल र पाकिस्तानले भुटानलाई पेनाल्टी सुटआउटमा पराजित गरेका थिए । नेपाल समूह चरणको पहिलो खेलमा पाकिस्तानसँग पराजित भए पनि माल्दिभ्सलाई ४–१ ले पराजित गर्दै सेमिफाइनल पुगेको थियो ।
