— बाँके राष्ट्रिय निकुन्ज भित्र पर्ने पूर्वपश्चिम राजमार्गमा वन्यजन्तुका साथै सवारीसाधन दुर्घटना न्यूनीकरणका लागि सोमबारदेखि टाईमकार्ड लागू गरिएको छ । निकुञ्ज क्षेत्रभित्र सवारीसाधन दुर्घटना हुनुका साथै सवारीसाधनबाट वन्यजन्तु समेत जोखिममा परेपछि टाईमकार्डको व्यवस्था गरिएको हो ।
निकुञ्जका सूचना अधिकारी अर्जुन भुसालले बाँकेको राप्तीसोनारी गाउँपालिका ८ स्थित शम्शेरगञ्जको ओभरीदेखि कचनापुर जिरो प्वाइन्ट (खैरी चेक पोष्ट) सम्म टाइमकार्ड लागू गरिएको बताए । उनका अनुसार निकुञ्ज क्षेत्रभित्र १५ किलोमिटरको दुरीमा टाइमकार्ड लागू गरिएको छ ।
निकुञ्ज क्षेत्रमा सवारीसाधान र वन्यजन्तु पनि सवारी दुर्घटनाको उच्च जोखिममा परेको भन्दै निकुञ्ज आसपासमा रहेका स्थानीय, नागरिक समाज, व्यवसायीलगायत सम्बन्धित पक्षले टाइमकार्ड लागू गर्न सुझाव दिएका थिए । सोहीअनुसार टाइमकार्ड लागू गरिएको हो ।
सो निकुञ्ज बर्दिया, दाङ र सल्यान गरी तीन जिल्लासँग जोडिएको छ । विसं २०६७ सालमा बाघको वासस्थान र जैविक मार्ग संरक्षणको उद्देश्यले घोषणा गरिएको बाँके राष्ट्रिय निकुञ्ज पाँच सय ५० वर्ग किलोमिटर फैलिएको छ । नेपालको दशौं राष्ट्रिय निकुञ्जको रुपमा यसलाई घोषणा गरिएको हो ।
