— लागूऔषध कसुरमा यहाँका ३ जना र हातहतियार तथा खरखजाना कसुरमा एक जनासहित एकै दिन चार जना पक्राउ परेका छन् ।
प्रहरीले खोजी अभियान चलाइरहेको बेला बागलुङ नगरपालिका ५ घर भइ वडा नं ४ मा डेरा लिइ बसेका २७ वर्षीय पूर्ण कुँवर, पर्वतको जलजला गाउँपालिका वडा नं. ९ घर भएका २८ वर्षीय विश्व गर्बुजा मगर र भारतको सिक्किम घर बताउने ५१ वर्षीय भीमबहादुर क्षेत्रीलाई प्रहरीले पक्राउ गरेको हो ।
उनीहरुको साथबाट डाइजापाम ५३ एम्पुल, ब्रुप्रेनोफाइन ५३ एम्पुल र फेनरगन ५३ एम्पुल गरी १ सय ५९ एम्पुल लागूऔषधसहित उनीहरुलाई पक्राउ गरिएको प्रहरी नायब उपरीक्षक मदन केसीले बताए । उनीहरु बस्ने कोठाको खाटमुनी लुकाइछिपाइ राखेको अवस्थामा लागूऔषध भेटिएको थियो ।
उनीहरुलाई बागलुङ जिल्ला अदालतबाट आइतबार ६ दिनको म्याद थप गरेर थप अनुसन्धान थालिएको छ । त्यस्तै, निसीखोला गाउँपालिका–६ को ६० वर्षीय दुलमनी बुढालाई प्रहरीले हतियारसहित पक्राउ गरेको छ । उनको घरबाट प्रहरीले अवैध भरुवा बन्दुक बरामद गरेको हो । बुढालाई पनि अदालतबाट आइतबारै ६ दिनको म्याद थप गरेर अनुसन्धान अगाडि बढाइएको केसीले जानकारी दिए ।
