— स्रोत नखुलेको १० लाख भारतीय रुपैयाँ सहित रुपन्देहीको बेलहिया नाकाबाट तीन जनालाई सशस्त्र प्रहरीले पक्राउ गरेको छ ।
सशस्त्र प्रहरी बल नेपालको प्रस्तावित सीमा सुरक्षा गुल्म (बीओपी) को टोलीले भारतबाट नेपालतर्फ आउँदै गरेका तीन जना भारतीय नागरिकलाई सो परिमाण बराबरको भारु सहित पक्राउ गरेको हो ।
गएराति ९ बजेतिर शंकास्पद रुपमा नेपाल आउँदै गरेका उनीहरुको जाँच गर्ने क्रममा स्रोत नखुलेको १० लाख भारु बरामद भएको रुपन्देहीको सशस्त्र प्रहरी बल नम्बर २७ गणले जानकारी दिएको छ ।
एक जनाको साथबाट ९ लाख भारु र अन्य दुई जनाको साथबाट ५०/५० हजार भारु बरामद गरेको गणले जनाएको छ ।
उनीहरुबाट बरामद गरिएको सबै ५ सय भारु नोट रहेको र ती नोट नेपालमा प्रतिबन्धित रहेको सशस्त्र प्रहरीले जनाएको छ ।
बरामद नोट राजश्व अनुसन्धान कार्यालयमा बुझाईने सशस्त्र प्रहरी बल नेपाल नं २७ गणका गणपति प्रहरी उपरीक्षक दीपक थापाले बताए ।
