— १९औं एसियाली खेलकुदअन्तर्गत भारोत्तोलनको समूह ‘बी’ को महिला ६४ केजीमा नेपालकी शारदा चौधरीले स्न्याचमा ७० तथा क्लिन एन्ड जर्कमा ८८ केजी गरी कुल १५८ केजी उचालेकी छन् ।
आफ्नो समूहमा शारदा पाँचौं स्थानमा रहिन् । स्न्याचमा शारदाले पहिलो लिफ्टमा ७० केजी र तेस्रो लिफ्टमा ७४ केजी उचाल्ने प्रयास गरे पनि सफल भइनन् । उनले क्लिन एन्ड जर्कमा उठाएको ८८ केजी पहिलो लिफ्टमा हो । शारदाले क्लिन एन्ड जर्ककै दोस्रो र तेस्रो लिफ्टमा ९४–९४ केजीको प्रयास सफल भएन ।
भारोत्तोलनमा नेपाली महिला खेलाडीको यात्रामा पूर्णविराम लागेको छ । यसअघि टीकामाया गुरुङले प्रतिस्पर्धा गरेकी थिइन् । पुरुष खेलाडी विशालसिंह विष्ट, विकास भट्ट र सागर भण्डारीले खेल्ने बाँकी छ ।
एथलेटिक्स
एथलेटिक्सको पुरुष ८ सय मिटर दौडमा नेपालका सोमबहादुर कुमाल १ मिनेट ५०.३८ सेकेन्ड निकाल्दै टाइमिङ सुधार गरेका छन् । हाङचउ ओलम्पिक स्पोर्ट्स सेन्टर स्टेडियममा समग्रमा भने २० खेलाडीमध्ये सोम ११ औं स्थानमा रहे । आफ्नो तेस्रो हिटमा भने उनी चौथो स्थानमा थिए । जहाँ नेपालसहित ७ राष्ट्रका खेलाडी थिए । यस इभेन्टको राष्ट्रिय कीर्तिमान सोमकै नाममा छ । १ मिनेट ५०.२५ सेकेन्डको कीर्तिमान उनले जकार्ता एसियाडमा राखेका थिए । १३ औं सागका कांस्य विजेता सोमले यसअघि ४ सय मिटर दौडबाट प्रतिस्पर्धा गरेका थिए ।
भलिबल
महिला भलिबलमा नेपाल दक्षिण कोरियासँग ३–० को सोझो सेटमा पराजित भएको छ । हाङचउ नर्मल युनिभर्सिटी कान्चिन जिम्न्याजियममा १ घण्टा १२ मिनेट चलेको खेलमा दक्षिण कोरियाले नेपाललाई २५–२१, २५–१४, २५–११ ले हरायो । समूह ‘सी’ को पहिलो खेलमा नेपाल भियतनामसाग २५–४, २५–१६ र २५–१३ को सीधा सेटमा हारेको थियो । हारसँगै नेपाल प्रतियोगिताबाट बाहिरिएको छ ।
ब्याडमिन्टन
ब्याडमिन्टनको मिक्स डबल्स र पुरुष डबल्समा नेपाल प्रिक्वाटरफाइनलमा प्रवेश गरेको छ । दुवै स्पर्धामा नेपाल २–० को सोझो सेटमा विजयी भयो । बिन्जियाङ जिम्न्याजियममा भएको मिक्स डबल्समा नेपालका विष्णु कटुवाल र नङसल तामाङको जोडीले मंगोलियाका जोल्जाया मुख्बटार र खेर्लेन दरखान्बटारको जोडीलाई २१–१६ र २१–१७ को सोझो सेटमा पराजित गरे । मिक्स डबल्समै सिंगापुरका तेरी काइ यङ हि र हान वेइ जेशिका तानको जोडीले नेपालका जीवन आचार्य र निता लम्सालको जोडीमाथि २१–४ र २१–३ को सहज जित दर्ता गरे ।
पुरुष डबल्समा नेपालका जीवन आचार्य र विष्णु कटुवालको जोडीले माल्दिभ्सका निवल अहमद र अजफान मोहम्मद रसिदको जोडीलाई २१–१७, २१–१८ ले हराए । सोही स्पर्धामा थाइल्यान्डका पिरात्चाई सुक्फुन र पाकापोन तिरारत्सकुलको जोडीले नेपालका प्रिन्स दाहाल र सुनील जोशीको जोडीलाई २१–८ र २१–५ ले पन्छाए ।
पुरुष सिंगल्समा जापानका केन्टा निसीमोटोले नेपालका प्रिन्स दाहाललाई २१–१२ र २१–७ तथा थाइल्यान्डका कान्ताफोन वाङचारियोनले नेपालका सुनिल जोशीलाई २१–७ र २१–९ को सोझो सेटमा पाखा लगाए ।
ट्रायथलन
ट्रायथलनको मिक्स रिलेमा नेपाल ११ औं भएको छ । १२ राष्ट्रको सहभागिता रहेको स्पर्धामा नेपालले ११ औं स्थान रहेको हो । नेपालबाट मौलिक महर्जन, युस्का महर्जन, वसन्त थारु र श्रेबी महर्जनले प्रतिस्पर्धा गरेका थिए । मंगोलिया अन्तिममा रह्यो ।
आर्चरी
आर्चरीको पुरुष व्यक्तिगत कम्पाउन्डको इलिमिनेसन राउन्डमा नेपालका योगेन्द्र शेरचन इराकका मोहमम्द इब्राहिम इसक अल दाघमनसँग १४०–१३५ ले पराजित भए । सोही स्पर्धाको महिलामा भारतकी गोपीचन्द स्वामी अदितीले नेपालकी इमायुङ राईलाई १४९–१३७ ले हराइन् ।
पुरुष व्यक्तिगत रिकर्भको इलिमिनेसनमा नेपालका तिलक पुनले मिश्रित प्रदर्शन गरे । तिलक राउन्ड अफ १६ मा दक्षिण कोरियाका जिन्येक ओहसंग ६–० ले पछि परे । त्यसअघि राउन्ड अफ ३२ मा तिलकले म्यान्मारका जाउ तेतलाई ७–१ ले हराएका थिए । उक्त स्पर्धाको महिलामा बंगलादेशकी दिया सिद्धिकीले नेपालकी मन्जु बजगाईंलाई ६–० ले पाखा लगाइन् ।
स्क्वास
स्क्वासको महिला सिंगल्समा नेपालकी पिवना ब्लोन जापानसंग ३–० ले पराजित भएकी छन् । जापानकी अकारी मिडोरिकावाले विपनालाई ११–३, ११–१ र ११–५ ले हराइन् । अघिल्लो दिन पहिलो चरणमा विपनाले थाइल्यान्डकी चुजित वारिट्साराबाट ११–७, ११–७ र ११–८ ले पराजित गर्दै प्रिक्वाटरफाइनलमा स्थान सुरक्षित गरेकी थिइन् ।
मिक्स डबल्स समूह ‘सी’ को दुवै खेलमा नेपाल पराजित भयो । नेपालका अमिर ब्लोन र स्वस्थानी श्रेष्ठको जोडी मलेसिया र थाइल्यान्डसँग क्रमशः २–० र २–१ को सेटमा पराजित भयो ।
