। सन् २०१८ मा अभिनेत्री श्रीदेवीको आकस्मिक निधनपछि उनका पति बोनी कपुरले यस विषयमा मौनता साँधेका थिए । तर यतिबेला उनले श्रीदेवीको निधनबारे महत्वपूर्ण खुलासा गरेका छन् ।
उनका अनुसार श्रीदेवीले नून बिनाको ‘स्ट्रिक्ट डाइट’ लिन्थिन् । जसका कारण श्रीदेवीलाई ‘ब्ल्याकआउट’ हुन्थ्यो । अभिनेता नागार्जुनले आफूलाई सुनाएको घटना पनि बोनीले सेयर गरे । उनका अनुसार श्रीदेवी बेहोस भइन्, जसका कारण उनको दाँत पनि भाँचिएको थियो ।
‘द न्यू इन्डियन’लाई दिएको अन्तर्वार्तामा बोनीले श्रीदेवीको मृत्युको बारेमा कुरा गर्दै यो प्राकृतिक नभई आकस्मिक मृत्यु भएको बताए । श्रीदेवीको मृत्युपछि आफूले ‘डिटेक्टर टेस्ट’को परीक्षणबाट गुज्रनुपरेको समेत बताए । आफूले कल्पना समेत नगरेका कुराहरु भोग्नुपरेको उनले बताए ।
बोनीले भने, ‘मैले यसबारे नबोल्ने निर्णय गरेको थिएँ किनभने जब ममाथि अनुसन्धान र सोधपुछ भइरहेको थियो । मैले २४ वा ४८ घण्टासम्म यसबारे कुरा गरें । मिडियाबाट दबाब आएकाले आफूहरुले त्यसो गर्नुपरेको अधिकारीले बताएका छन् । उनीहरुले यसमा कुनै बेइमानी नभएको थाहा पाए । म सबै परीक्षणबाट गुज्रिएँ जसमा ‘लाई डिटेक्टर टेस्ट’ र अन्य परीक्षण पनि सामेल थिए ।
अनि निसन्देह, त्यसपछि आएको रिपोर्टले यो मृत्यु आकस्मिक भएको भन्यो ।’
निधनको समयमा श्रीदेवी कडा खालको डाइटमा रहेको बोनीले बताएका छन् । उनले भने, ‘उनी प्रायः भोकै हुन्थिन् । राम्री देखिन चाहन्थिन् । स्क्रिनमा राम्री राम्रो देखिन सकोस् भनेर उनले आफ्नो सेपलाई ध्यान दिन्थिन् । जब मसँग उनको विवाह भयो, तब उनी ब्ल्याकआउटबाट पीडित भइन् र चिकित्सकले उनलाई कम रक्तचापको समस्या भएको बताए ।’
त्यसपछि बोनीले अभिनेता नागार्जुनले आफूलाई सुनाएको घटना उल्लेख गरे । नागार्जुनले एक सुटिङका क्रममा श्रीदेवी बाथरुममा बेहोस भएको बताएका थिए । बोनीले भने, ‘यो निकै दुर्भाग्यपूर्ण थियो । पछि उनको मृत्यु भएपछि नागार्जुन घर आए । उनले फिल्मको सुटिङका क्रममा आफू फेरि क्र्यास डाइटमा रहेको बताइन् र बाथरुममा बेहोस भएर लडिन्, जसमा उनको दाँत भाँचिएको थियो ।’
बोनीले श्रीदेवीलाई सुरुदेखि नै कडा र क्र्यास डाइटमा बस्ने बानी रहेको बताए । त्यसैले उनले डाक्टरलाई श्रीदेवीको खानामा थोरै नुन समावेश गर्न भनेका थिए । श्रीदेवीले आफ्नो खानामा नुन पटक्कै खाइनन् । बोनीका अनुसार रात्रिभोजको समयमा पनि श्रीदेवीले खानामा नुन नहोस् भनेर जिद्दी गरिन् । दुर्भाग्यवश, श्रीदेवीले यो विषयलाई गम्भीरतापूर्वक लिइनन् र सायद यो कुरा उनको लागि धेरै गम्भीर र घातक भयो ।’
२४ फेब्रुअरी, २०१८ मा दुबईको एक होटलको बाथटबमा डुबेर श्रीदेवीको मृत्यु भएको थियो । पोस्टमार्टम रिपोर्टमा श्रीदेवीको मृत्युको कारण दुर्घटनावश डुबेर भएको बताइएको छ ।
