– अमेरिकी संसद्का सभामुख केभिन म्याकार्थी पदबाट बर्खास्त भएका छन्। अमेरिकी संसद्को २ सय ३४ वर्षको इतिहासमा पहिलोपटक कुनै बहालवाला सभामुख यसरी पदमुक्त गरिएका हुन्। संसद्को तल्लो सदनले उनलाई पदबाट हटाउने प्रस्तावको पक्षमा मतदान गरेको थियो।
आफ्नै दल रिपब्लिकन पार्टीका ८ जना चरम दक्षिणपन्थी सांसदले नै उनलाई पदमुक्त गर्ने पक्षमा मतदान गरेका थिए। मंगलबार संसद्मा भएको ऐतिहासिक मतदानमा मकार्थीलाई पदमुक्त गर्ने पक्षमा २ सय १६ मत परेको थियो भने विपक्षमा १ सय १० मत पर्यो।
संसद्मा उपस्थित सबै २ सय ८ डेमोक्रयाटिक सांसदले प्रस्तावको पक्षमा मतदान गरे भने आठ जना विद्रोही रिपब्लिकनले उनीहरूलाई साथ दिए। सबैभन्दा रोचक त के भने उनको आफ्नै दल रिपब्लिकन पार्टीका फ्लोरिडा राज्यबाट निर्वाचित सांसद म्याट गेट्जले नै संसद्मा उनलाई पदमुक्त गर्नेसम्बन्धी प्रस्ताव दर्ता गराएका थिए। मंगलबारको विद्रोहको नेता पनि गेट्ज नै हुन्। उनी सुरुदेखि नै म्याकार्र्थीको विरोधमा रहँदै आएका थिए।
अमेरिकी सरकार आंशिक सट डाउनमा जानबाट रोक्न गत शनिबार पारित गरिएको सहमतिको विधेयकका सम्बन्धमा म्याकार्र्थीले खेलेको भूमिकाप्रति गेट्जले असन्तुष्टि जनाएका थिए। सभामुख पदमा निर्वाचित भएको नौ महिना पनि पूरा नहुँदै उनलाई अपदस्थ गरिएको हो।
