— 'क्वान्टम डट्स को खोजी तथा संश्लेषण' मा संलग्न वैज्ञानिकहरूलाई यस वर्षको रसायनशास्त्रतर्फको नोबेल पुरस्कार दिइने भएको छ ।
बुधबार रोयल स्विडिस एकेडेमीले पछिल्लो समय 'नानोटेक्नोलोजी टुलबक्स' का लागि महत्त्वपूर्ण भूमिका खेल्ने क्वान्टम डट खोजी गर्ने तीन जना वैज्ञानिक मौंगी जी बावेन्डी, लुई ई ब्रस र अलेक्सेई आई इकिमोभलाई रसायनशास्त्रतर्फको नोबेल पुरस्कार दिने घोषणा गरेको हो ।
क्वान्टम डट्सले कम्प्युटर मनिटर तथा टेलिभिजन स्क्रिनलाई उज्यालो बनाउँछ । त्यस्तै चिकित्सकहरूलाई ट्युमर पत्ता लगाउन पनि यसको प्रयोग हुने एकेडेमीले जनाएको छ ।
कमिटीले पुरस्कार विजेता घोषणा गर्नुअघि नै यस वर्षका रसायनशास्त्रतर्फका विजेताको नाम सूची लिक भएको थियो । नोबेल कमिटीले पठाएको इमेलका आधारमा स्विडिस समाचारपत्र अफ्टनब्लाडेटले सम्भावित विजेताको नाम सार्वजनिक गरेको थियो ।
रसायनशास्त्रतर्फको नोबेल पुरस्कार विजेतालाई मेडल र संयुक्त रूपमा १ करोड १० लाख स्विडिस क्रोनर दिइनेछ । गत वर्ष रसायनशास्त्रका लागि तीन जना वैज्ञानिकले संयुक्त रूपमा पुरस्कार पाएका थिए । अणुहरूको काँटछाँटसम्बन्धी अनुसन्धानका लागि गत वर्ष क्यारोलिन बर्टोजी, मोर्टन मेल्डल र ब्यारी शार्पलेशलाई नोबेल पुरस्कार प्रदान गरिएको थियो ।
यस वर्षको भौतिकशास्त्र र चिकित्शास्त्रतर्फको पुरस्कार घोषणा भइसकेको छ । यस वर्ष 'सुक्ष्म समय' पत्ता लगाउने प्रकाशसम्बन्धी प्रायोगिक विधिका लागि तीन जना वैज्ञानिकलाई यस वर्षको भौतिकशास्त्रतर्फको नोबेल पुरस्कार दिइने भएको छ । त्यस्तै कोरोना भाइरसविरुद्धको एमआरएन खोप विकासका लागि तीन वैज्ञानिकले चिकित्साशास्त्रतर्फको नोबेल पुरस्कार पाउने भएका छन् ।
यस वर्ष साहित्यतर्फ अक्टोबर ५, शान्तिका लागि अक्टोबर ६ र अर्थशास्त्रका लागि अक्टोबर ९ मा विजेता घोषणा गरिनेछ ।
