— संस्कृति, पर्यटन तथा नागरिक उड्डयनमन्त्री सुदन किराँतीले नेपाल वायुसेवा निगमको ४ अर्ब ऋण तिरिसकिएकाे बताएका छन् । आफू मन्त्री भएर जिम्मेवारी सम्हालेपछि वायुसेवा निगमकाे ४ अर्ब ऋण तिरिएकाे र आगामी दिनमा नयाँ जहाज खरिद प्रक्रिया अगाडि बढाउन लागिएको उनले जानकारी दिएका छन् ।
अन्तर्राष्ट्रिय सम्बन्ध र पर्यटन समितिकाे बिहीबारको बैठकमा मन्त्री किराँतीले भने, 'दुई पटक गरेर ४ अर्ब ऋण तिरिसकेका छाैं । साना जहाज खरिदकाे प्रक्रियामा अगाडि बढेका छाैं ।' वायुसेवा निगमको इतिहास लामाे रहेकाे र धमिजा-लाउडा काण्ड भाेग्दै आएकाेले अवस्था जटिलता बन्दै गएकाे पनि मन्त्री किराँतीले बताए ।
नेपालमा वायुसेवा सञ्चालन र नियमनकाे कानुनी प्रावधान पनि नयाँ नरहेको मन्त्री किराँतीकाे भनाइ छ । 'रेष्टुरेन्ट चलाउने ऐन र जहाज चलाउने ऐन एउटै छ नेपालमा,' उनले भने । चिनियाँ जहाज ग्राउन्डेड हुँदा निगमले नियमित रुपमा घाटा बेहाेरिरहेकाे मन्त्री किराँतीकाे दाबी छ । उनले ती विमानको पार्किङ र बीमा रकमले नै निगमलाई नियमित घाटामा लगिरहेकाे बताए । चलाउन पनि नसकिने र त्यसकाे दायित्वबाट पनि उन्मुक्ति नमिलेकाे उनले दुखेसाे पाेखे । 'यसकाे पार्किङ चार्ज पनि तिर्नुपर्ने छ । लिजमा लिने पनि आउँदैनन् । यी जहाज भालुकाे कम्पट भएको छ । समाउ हात थाकिसक्याे, नसमाउ आफैलाई खान्छ ।'
मन्त्रीले नागरिक उड्डयनसँग सम्बन्धित २ विधेयक मन्त्रिपरिषदमा पुगेको पनि जानकारी दिए । वायुसेवा सञ्चालन र नियमन गर्ने विधेयकमा अर्थ मन्त्रालय र कानुन मन्त्रालयको सहमति प्राप्त भइसकेको उनले जानकारी दिए ।
