— नेपालका विशालसिंह विष्टले पदकबाट धेरै टाढा रहे पनि भारोत्तोलनमा बिहीबार ऐतिहासिक प्रदर्शन गरेका छन् । चियोसन स्पोर्ट्स सेन्टर जिम्न्याजियममा सम्पन्न पुरुष ९६ केजी तौल समूहमा विशालले तीन राष्ट्रिय कीर्तिमानसहित ३ सय १ केजी उठाउने दुर्लभ कीर्तिमान स्थापित गरेका छन् । नेपाली भारोत्तोलकले कुनै पनि तौल समूहमा कुलमा ३ सय केजीसम्म भार उचालेको यो पहिलोपल्ट हो । सुनील जोशीले यसअघि अभ्यासमा तीन सय केजी उठाएको दाबी गरिन्छ ।
विशालले स्न्याचमा १ सय ३३ केजी, क्लिन एन्ड जर्कमा १६८ केजी र कुलमा ३ सय १ केजी उठाए । स्न्याचमा १२६ केजी, क्लिन एन्ड जर्कमा १६५ केजी र कुलमा २९१ केजीको राष्ट्रिय कीर्तिमान उनकै नाममा थियो । उनले उक्त कीर्तिमान केही साताअघि रियादमा सम्पन्न विश्व भारोत्तोलन च्याम्पियनसिपमा स्थापित गरेका थिए । स्न्याचमा भने विशालले दोस्रो लिफ्टमा नै १ सय २७ केजी उठाउँदै राष्ट्रिय कीर्तिमान स्थापित गरिसकेका थिए । पहिलो लिफ्टमा विशालले १ सय २१ केजी उचालेका थिए । क्लिन एन्ड जर्कमा उनले पहिलो लिफ्टमा १ सय ६१ केजी उठाएका थिए ।
दोस्रो लिफ्टमा विशाल १६८ केजी उचालेर राष्ट्रिय कीर्तिमान रचेपछि तेस्रो लिफ्टमा कीर्तिमान सुधार गर्ने प्रयासमा १ सय ७५ केजी उठाउन भने सफल भएनन् । खेलपछि उनले भने, ‘यो प्रदर्शनका लागि म निकै खुसी छु । यो प्रदर्शनले मलाई भविष्यमा अझ राम्रो प्रदर्शन गर्न प्रेरित गर्नेछ ।’ नेपाल भारोत्तालन संघका अध्यक्ष रामकृष्ण श्रेष्ठले विशालको प्रदर्शनप्रति खुसी व्यक्त गरे । उनले भने, ‘नेपाली भारोत्तोलन इतिहासमा विशालको प्रदर्शन दुर्लभ छ र यो दिनलाई भारोत्तोलनले बिर्सन सक्ने छैन ।’
एथलेटिक्स
म्याराथनमा नेपालका दुवै खेलाडीले सन्तोषजक प्रदर्शन गर्न सकेनन् । उनीहरूले आफ्नो टाइमिङ पनि सुधार्न सकेनन् । पुरुषतर्फ राजन रोकाया समग्रमा १४ औं स्थानमा रहे । उनले निर्धारित दूरी पूरा गर्न २ घण्टा २३ मिनेट १७ सेकेन्ड खर्चिए । जबकि राजनको व्यक्तिगत उत्कृष्ट टाइमिङ २ घण्टा २० मिनेट ०८ सेकेन्डको हो ।
कुल १८ खेलाडी सहभागी भएकोमा साउदी अरेबिया र किर्गिस्तानका खेलाडीले दौड पूरा गरेनन् । चीनका जी हेले २ घण्टा १३ मिनेट ०२ सेकेन्डमा दौड पूरा गर्दै स्वर्ण जिते । उत्तर कोरियाका हानले २ घण्टा १३ मिनेट २७ सेकेन्डबाट रजत र चीनकै याङले २ घण्टा १३ मिनेट ३७ सेकेन्डबाट कांस्य जिते ।
महिलातर्फ पुष्पा भण्डारीले निर्धारित दूरी ३ घण्टा ०२ मिनेट ३७ सेकेन्डमा पूरा गरिन् । सहभागी १७ खेलाडीमध्ये सागकी कांस्य विजेता पुष्पाले १६ औं स्थानमा दौड टुंग्याइन् । सागमा २ घण्टा ५० मिनेट ११ सेकेन्डको टाइमिङ निकालेकी उनले गत वर्ष ढाका म्याराथनकी स्वर्ण जितेकी थिइन् । बहराइनकी पाउल चुम्बा युनिस छेबिचीले पहिलो स्थान हात पार्ने क्रममा २ घण्टा २६ मिनेट १४ सेकेन्डको समय निकालिन् । चीन र काजकिस्तानका खेलाडीले रजत र कांस्य जिते ।
कराते
पदकको आस गरिएको करातेको पहिलो दिन नेपाली खेलाडीको प्रदर्शन सुखद रहेन । नेपालका तीन खेलाडीले प्रतिस्पर्धा गरेकामा तीनै खेलाडी पराजित भएर प्रतियोगिताबाट बाहिरिएका छन् । लिनपिङ स्पोर्ट्स सेन्टर जिम्न्याजियममा भएको पुरुष ७५ केजीमुनि नेपालका शेखु मोहम्मद आलम काजकिस्तानका खेलाडीसँग पराजित भए । काजकिस्तानका नुरकान्त अझिकानोभले शेखुलाई अंकका आधारमा ५–० ले पराजित गरे । रिपिचेजको पहिलो बाउटमा बाइ पाएका शेखु रिपिचेजकै अर्को बाउटमा भने किर्गिस्तानका नजिम नुर्लानोभसँग २–० ले चुके ।
एकल कातातर्फ पुरुषमा स्वर्णिम मानन्धर र महिलामा एलिसा मागर रास्कोटी पनि पहिलो चरणभन्दा अगाडि बढ्न सकेनन् । स्वर्णिमले ३८.३० र एलिसाले ३७.३० अंक जोडेका थिए ।
कुस्ती
कुस्तीमा नेपालकी शिवाङ्गी दुवे पराजित भएकी छन् । लिनान स्पोर्ट्स कल्चर एन्ड एक्जिविसन सेन्टरमा महिला ५७ केजी तौल समूहको पहिलो चरणको खेलमा थाइल्यान्डकी श्रृपाराले
शिवाङ्गीलाई ८–० ले पराजित गरिन् । १३ औं सागमा शिवाङ्गीले रजत पदक जितेकी थिइन् । पहिलो राउन्डमा श्रृपाराले ८–० अंक जोडिन् भने दोस्रोमा दुवैले अंक बटुल्न सकेनन् ।
क्यानोइङ
क्यानोइङ स्लालमअन्तर्गत पुरुष कायकमा नेपालका गणेश गुरुङ शुक्रबार सेमिफाइनलका लागि छनोट भएका छन् । दुई चरणको हिट्समा प्रतिस्पर्धी भएका गणेश सेमिफाइनल चरणमा पुगेका हुन् । कायकमा १६ खेलाडी सेमिफाइनल पुग्ने प्रावधान छ । गणेश पहिलो हिट्समा १६ खेलाडी सहभागी भएकोमा १४ औं भए । पहिलो हिट्सबाट ८ खेलाडी सेमिफाइनल चरणमा पुगेका थिए ।
दोस्रो हिट्समा नेपालका गणेशसहित आठ खेलाडीले प्रतिस्पर्धा गर्दा उनी सातौं हुँदै छनोट भए । दोस्रो हिट्समा खेलेका सबै खेलाडी सेमिफाइनल चरणमा छनोट भएका हुन् । सेमिफाइनल चरणमा १६ खेलाडी प्रतिस्पर्धी हुनेछन् । त्यसबाट १० खेलाडीले फाइनल चरणमा प्रतिस्पर्धा गर्नेछन् ।
