: नेपाल क्रिकेट संघका सचिव पारस खड्काले सबैको सोच र विचार केबल नेपाली क्रिकेटको विकासमा हुने बताएका छन् । पूर्वकप्तान समेत रहेका खड्काले नीतिगत तहबाट प्रयास गरी अगाडि बढ्ने बताएका हुन्।
उनले नेपाली क्रिकेटको विकास तथा विस्तारका निमित्त काम गर्ने प्रतिबद्धता व्यक्त गरे। ‘नेपाल क्रिकेट संघको सम्पन्न वार्षिक साधारण सभा तथा अधिवेशनबाट निर्वाचित हुनु हुने सम्पूर्ण पदाधिकारी एवं कार्यसमिति सदस्यज्युहरुलाई हार्दिक बधाई तथा शुभकामना व्यक्त गर्दछु। साथै, मलाई विश्वास गरेर नेपाल क्रिकेट संघको निर्वाचित सचिव बन्नका निमित्त मतदान गर्नुहुने सम्पुर्ण मतदाताज्युहरु तथा शुभकामना व्यक्त गर्नुहुने सबै नेपाली क्रिकेट शुभचिन्तकहरुमा हार्दिक आभार तथा कृतज्ञता व्यक्त गर्दछु।’उनले भने,‘नेपाली क्रिकेटले बोकेको सम्भावना, यसको विकास तथा विस्तारका निमित्त नीतिगत तहबाट प्रयास गरी, नवनिर्वाचित कार्यसमितिको विश्वास लिई अघि बढ्ने प्रतिबद्धता व्यक्त गर्दछु। अब हामी सबैको सोच र विचार केबल नेपाल क्रिकेटको विकास हुनेछ भन्ने विश्वास गरेको छु।’
क्यानको निर्वाचनमा सचिव पदका लागि ८५ मत खसेकोमा खड्का ४८ मत ल्याएर विजयी भएका हुन्। उनका प्रटिद्वन्द्वी प्रशान्तविक्रम मल्लले ३७ मत पाएका थिए।
