: १९औं एसियाली खेलकुदअन्तर्गत महिला भलिबलमा नेपाल लगातार पराजित भइरहेको छ। शुक्रबार नवौंदेखि १२औं स्थानसम्मका लागि भएको खेलमा नेपाल हङकङसँग पराजित भएको हो। निकै कमजोर प्रदर्शन गरेको नेपाल हङकङसँग ३–० ले पराजित भएको हो। हाङचाओ नर्मल युनिभर्सिटी जिम्न्याजियममा भएको खेलमा नेपाल हङकङसँग २५–२२, २५–१६, २५–१८ ले पराजित भएको हो।
पहिलो पटक एसियाली खेलकुदमा सहभागिता जनाएको नेपालको यो चौथो हार हो। समूह चरणमा भियतनाम र दक्षिण कोरियासँग पराजित भएको नेपाल त्यसपछि क्लासिफिकेसन खेलमा भारतसँग पराजित भएको थियो।
नेपालले अब ११औं स्थानका लागि मंगोलियासँग शनिबार प्रतिस्पर्धा गर्नेछ। मंगोलिया शुक्रबार भएको खेलमा भारतसँग ३–० को सोझो सेटमा पराजित भएको थियो।
यसैगरी डान्स स्पोर्ट्सको ब्रेकिङ विधामा नेपालका दीपक लामा पहिलो चरणबाटै बाहिरिएका छन्। शुक्रबार भएको पुरुषतर्फको प्रिसेलेक्समा प्रतिस्पर्धा गरेका उनी पहिलो चरणबाटै बाहिरिएका हुन्। प्रिसेलेक्सनमा कुल २५ खेलाडीले प्रतिस्पर्धा गरेकोमा दीपक २३औं स्थानमा रहेका थिए। दीपकले ताजकिस्तानका दुई खेलाडीलाई पछि पारेका थिए।
प्रिसेलेक्सनबाट शीर्ष १६ स्थानमा रहेका खेलाडीहरू अघिल्लो चरणमा प्रवेश गरेका थिए। एसियाली खेलकुदमा नेपालले पहिलो पटक डान्स स्पोर्ट्समा सहभागिता जनाएको हो। दीपकले चीन आउनु अघि बेल्जियममा भएको वल्र्ड डान्स च्याम्पियनसिपमा प्रतिस्पर्धा गरेका थिए।
यसैगरी कुस्तीमा नेपालकी सुशिला चन्द पराजित भएकी छन्। लिनान् स्पोर्ट्स कल्चर एन्ड एक्जिबिसन सेन्टरमा भएको महिला ६२ केजीको पहिलो चरणमा भारतकी सोनमले सुशिलालाई १०–० ले पराजित गरेकी हुन्। अघिल्लो दिन महिला ५७ केजीको पहिलो चरणमा नेपालकी सुवाङ्गी दुवे थाइल्यान्डकी श्रृपारासँग ८–० ले पराजित भएकी थिइन्।
शनिबार दुई पुरुष खेलाडीले नेपालको चुनौती प्रस्तुत गर्ने छन्। १२५ केजीमा नेपालका राज यादवले कम्बोडियाका बाली सोउ तथा ७४ केजीमा नेपालका सुरेश चुनाराले तुर्कमेनिस्तानका पर्मन होम्मादोभसँग खेल्ने छन्।
