: विद्युतीय सवारी आयातकर्ताले आयात गरेका सवारी भन्सार जाँचपासका लागि सिधै चोभार ल्याउन थालेका छन्। चोभारस्थित नवनिर्मित सुख्खा बन्दरगाहमा शनिबारदेखि विद्युतीय गाडीहरू समेत आउन थालेको बन्दरगाह निर्माण तथा व्यवस्थापन गरिरहेको नेपाल इन्टरमोडल यातायात विकास समितिका कार्यकारी निर्देशक आशिष गजुरेलले जानकारी दिए।
ईभी नेपालजी मोटर्सले ४ वटा इलेक्ट्रिक कार कन्टेनरमा राखी चोभार सुक्खा बन्दरगाहमा ल्याएको हो। उक्त गाडीहरू भन्सार जाँचपासका लागि वीरगञ्ज नाकाबाट सिधै चोभार सुक्खा बन्दरगाहमा ल्याइएको हो।
सुरुमा कन्टेनराइज्ड कार्गो मात्र आउने गरेकोमा चोभार सुख्खा बन्दरगाहमा गत असार १४ गतेदेखि भन्सार जाँच पासका लागि नयाँ सवारी साधनहरू समेत आउन थालेकामा पहिलोपल्ट विद्युतीय गाडी आएको हो। बन्दरगाह २०७८ चैत्र २२ देखि सञ्चालनमा आएको हो।
हाल सम्म सांग्रिला मोटर्स, जीओ अटो मोबाइल्सलगायत अन्य कम्पनीहरूका पेट्रोलियम पदार्थबाट चल्ने ८३ वटा गाडी चोभार भन्सार कार्यालयबाट जाँचपास भएका छन्। चोभार भन्सार कार्यालयबाट भन्सार जाँचपास प्रक्रिया व्यवस्थित भएपछि सवारी साधन चोभार आउन थालेका हुन। आगामी दिनमा अझै थप सवारी चोभार आउने जानकारी आयातकर्ताहरूले गराएको गजुरेलले बताए।
चोभार सुक्खा बन्दरगाह पूर्ण क्षमतामा सञ्चालनमा ल्याउनका लागि कन्टेनराइज्ड मालवस्तु एवं नयाँ सवारी साधनहरू चोभार सुक्खा बन्दरगाहमा भन्सार जाँचपासका लागि ल्याउन आयातकर्तासँग पटक पटक छलफल भएको र चाँडै पुनः आयात/निर्यातकर्ताहरूसँग छलफल गरिने गजुरेलको भनाइ छ।
चोभार सुक्खा बन्दरगाह भन्सार कार्यालयमा भन्सार जाँचपासका लागि आउने मालवाहक सावरी साधन एवं नयाँ सवारी साधनहरूका लागि प्रवेश निःशुल्क छ। यसैगरी पार्किङ एवं गोदाम शुल्क समेत न्यूनतम् गरी समितिले स्तरीय सेवा प्रदान गरिरहेको छ।
हालसम्म चोभार सुक्खा बन्दरगाहमा २०२ वटा कन्टेनर र ८७ (८३ वटा पेट्रोल र ४ वटा इलेक्ट्रिक) नयाँ गाडीहरू भन्सार जाँचपासका लागि आइसकेको र उक्त आउने क्रम निरन्तर रुपमा बढी रहेको इन्टरमोडलले जनाएको छ।
सुक्खा बन्दरगाहको एक्जिम क्षेत्रमा भएको दुईवटा गोदामहरू पनि आयातकर्ताले सामान भण्डारणका लागि प्रयोग गर्ने गरेका छन् भने आन्तरिक टर्मिनलको पार्किङ एवं गोदाम प्रयोगका लागि आउने व्यवसायीहरूको संख्या समेत बढ्दो क्रममा रहेको इन्टरमोडलले जनाएको छ।
बन्दरगाह सञ्चालन तथा व्यवस्थापनका लागि निजी क्षेत्रलाई दिनका लागि हाल कम्पनी छनौट प्रकृया भइरहेको र निकट भविष्यमा नै यस सुक्खा बन्दरगाहको सञ्चालन तथा व्यवस्थापनको जिम्मा निजी क्षेत्रलाई हस्तान्तरण हुने गजुरेलले बताए। ‘निजी क्षेत्रबाट यस सुक्खा बन्दरगाहको सञ्चालन तथा व्यवस्थापन सुरु भएपछि बन्दरगाहबाट व्यापारिक कारोबारमा अझै वृद्धि हुनेछ,’ गजुरेलले भने।
