आर्सनलले इंग्लिस प्रिमियर लिगमा म्यानचेस्टर सिटीलाई हराउन आठ वर्षको प्रतीक्षामा आइतबार पूर्णविराम लगाएको छ ।
ग्याब्रिएल मार्टिनेलीले खेलको अन्त्यतिर गरेको कडा प्रहार गोलमा परिणत भएपछि डिफेन्डिङ च्याम्पियन सिटी १–० ले पराजित भएको हो । जितसँगै इमिरेट्समा खुसीयाली छाएको थियो ।
सिटीको व्यवस्थापकमा पेप ग्वार्डिओला आएयता आर्सनल लिगका पछिल्ला १२ खेलमा पराजित रहेको थियो । यो जितपछि आर्सनलको आठ खेलबाट २० अंक भएको छ र यो शीर्ष स्थानमा रहेको टोटनहमसँग बराबरीको स्थिति हो । सिटी भने १८ अंकमा तेस्रोमा छ । लिभरपुल १७ अंकमा चौथो स्थानमा छ ।
लिभरपुल आइतबारको अर्को खेलमा ब्राइटनसँग २–२ को बराबरीमा रोकियो भने वेस्ट ह्याम र न्युकासल युनाइटेडले पनि समान २–२ को बराबरी खेले । यस्तै, उल्भ्स र एस्टन भिल्लाबीचको खेल १–१ को बराबरीमा छुट्यो ।
