— वामपन्थी सरकारका लागि राजनीतिक समर्थनको बदलामा क्याटालान पृथकतावादीलाई आममाफी दिने योजनाको विरोध गर्न दक्षिणपन्थी अधिकारीहरूले स्पेनको बार्सिलोनामा आइतबार प्रदर्शन गरेका छन् ।
स्पेनबाट पृथक् हुने क्षेत्रको विरोध गर्ने एक नागरिक समूह सोसिटाट सिभिल क्याटालाना (एससीसी) को आह्वानमा भएको उक्त प्रदर्शनमा हजारौंले ‘आममाफी हुँदैन’ भन्दै स्पेनी र क्याटालानको झन्डा बोकेर विरोध गरेका थिए । प्रधानमन्त्रीका रूपमा आफ्नो भूमिका पुनः सुरु गर्न सक्ने गरी सन् २०१७ मा स्वतन्त्रता माग गरेकामा कानुनी कारबाहीको सामना गरिरहेका क्याटालान पृथकतावादीलाई उनीहरूको समर्थनको बदलामा आममाफीको प्रस्ताव गर्ने कार्यवाहक प्रधानमन्त्री पेड्रो सान्चेजको योजनाको विरोधमा प्रदर्शन गरिएको हो ।
उक्त प्रस्तावप्रति स्पेनमा दक्षिणपन्थी र उग्र दक्षिणपन्थीहरूका साथै सान्चेजको सोसियलिस्ट पार्टीभित्रका केहीले चर्को प्रतिक्रिया दिएका छन् । उनीहरूले सत्तामा रहिरहन आममाफीलाई मोलमोलाइको विषय बनाउन नसकिने बताएका छन् । बार्सिलोनाको गार्डिआ अर्बाना प्रहरीले प्रदर्शनमा ५० हजारभन्दा बढी सहभागी भएको जनाएको छ । तर प्रदर्शनकारीले तीन लाख बढी प्रदर्शनमा जम्मा भएको बताएका छन् ।
