— मोहम्मद रिजवान र अब्दुल्लाह सफिकले शतक बनाएपछि पाकिस्तानले विश्वकप क्रिकेटमा मंगलबार श्रीलंकालाई ६ विकेटले पराजित गरेको छ ।
रिजवानले अविजित १ सय ३१ र सफिकले १ सय १३ रन बनाएपछि पाकिस्तानले ३ सय ४५ रनको कीर्तिमान विजय लक्ष्य १० बलअघि पूरा गरेको थियो ।
पाकिस्तानले विश्वकपमा सबैभन्दा ठूलो विजय लक्ष्य पछ्याउने कीर्तिमान बनाएको हो । आयरल्यान्डले भारतमै २०११ मै भएको विश्वकपमा यसअघि इंग्ल्यान्डविरुद्ध ३ सय २८ रनको विजय लक्ष्य पूरा गरेको थियो । अघिल्लो खेलमा नेदरल्यान्ड्सलाई पराजित गरेको पाकिस्तानको यो लगातार दोस्रो जित हो । श्रीलंकाको भने यो लगातार दोस्रो हार हो ।
रिजवानले एकदिवसीय अन्तर्राष्ट्रियमा आफ्नो उच्च स्कोर बनाउनेक्रममा १ सय २१ बल खेल्दै ८ चौका र ३ छक्का प्रहार गरे । आफ्नो केवल पा“चौं एकदिवसीय खेल्दै गरेका सफिकले १ सय ३ बल खेली १० चौका र ३ छक्का प्रहार गरे । सफिकलाई फर्ममा नरहेका फाखर जमानको स्थानमा ल्याइएको थियो ।
श्रीलंकाबाट पनि यसअघि दुई शतक बनेको थियो । कुशल मेन्डिसले ७७ बलमा १४ चौका र ६ छक्का प्रहार गर्दै १ सय २२ र सदिरा समराविक्रमाले ८९ बलमा ११ चौका र २ छक्कासहित १ सय ८ रन बनाएपछि टस जितेको श्रीलंकाले ३४४–९ को स्कोर बनाएको थियो ।
धर्मशालामा दिनको अर्को खेलमा इंग्ल्यान्डले बंगलादेशलाई १ सय ३७ रनले हराएको थियो । पहिलो खेलमा न्युजिल्यान्डसँग ९ विकेटको लज्जास्पद हार बेहोरेको साविक विजेता इंग्ल्यान्ड विजय लयमा फर्किएको हो ।
डेबिड मालनले १ सय ७ बलमा १ सय ४०, जो रुटले ६८ बलमा ८२ र जोनी बेरिस्टोले ५२ रन बनाएपछि इंग्ल्यान्डले ९ विकेट गुमाई ३ सय ४ रन बनायो । लिट्टोन दासले ६६ बलमा ७६ र मुसफिकर रहिमले ५१ रन बनाए पनि बंगलादेश ४८.२ ओभरमा २ सय २७ रनमा अलआउट भयो ।
