— फुटबल विश्वकप–२०२६ क्वालिफायर्स एसिया जोन राउन्ड–१ अन्तर्गत लाओससँगको खेलका लागि नेपाली राष्ट्रिय फुटबल टोलीले तयारी तीव्र पारेको छ । असोज २५ गते दशरथ रङ्गशालामा हुने लाओससँगको खेलका लागि तयारी तीव्र पारेको हो ।
फिफा वरीयतामा लाओस १८६ औँ र नेपाल १७५ औँ स्थानमा छन् । मुख्य प्रशिक्षक भिन्सेन्जो अल्बर्टो एनेसले हाल २५ सदस्यीय नेपाली टोलीलाई बन्द प्रशिक्षणमा राखेर तयारी गरिरहेका छन् । प्रशिक्षकले मंगलबार अभ्यासका क्रममा तयारी राम्रो रहेको बताए । उनले लाओससँग खेल्नका लागि आफूहरू सबै किसिमले तयार रहेको बताए ।
त्यस्तै खेलाडी रोहित चन्दले नेपाल र लाओस एकै स्तरको टिम भएकाले राम्रोसँग खेल्नुपर्ने बताए । उनले तयारी राम्रो भएको र नयाँ खेलाडीहरू भएकाले जोश जाँगर रहेको बताए । नयाँ खेलाडीलाई आफूहरूको अनुभव सिकाउने उनको भनाइ छ । उनले लाओससँगको म्याचमा फोकस र एक वर्ष व्यस्त हुने भएकाले लाओससँग जित्नेगरी खेल्ने बताए ।
नेपाल र लाओसबीचको खेलका लागि टिकटदर साधारण पाराफिटतर्फ तीन सय र भीआईपी पाराफिटतर्फ पाँच सय कायम गरिएको छ । खेलको टिकट एन्फा आफैंले बिक्री गर्नेछ । सो प्रतियोगिताका लागि ७३ लाख ६८ हजार चार सय खर्च हुने अनुमान गरिएको छ ।
