— जर्मनीका हेस्से र बाभेरियामा आइतबार भएको निर्वाचनमा कन्जरभेटिभ पार्टी क्रिश्चियन डेमोक्रेटिक युनियन (सीडीयू) र क्रिश्चियन सोसियल युनियन (सीएसयू) विजयी भएका छन् । जर्मनीका हालका चान्सलर ओलाफ स्कोल्जको पार्टीसहितको वामपन्थी गठबन्धन भने पराजित भएको हो । यसको असर जर्मनीका अन्य स्थानमा हुने चुनावमा पनि पर्ने अनुमान गरिएको छ ।
जर्मनीका सम्पन्नशाली राज्यको चुनावमा मध्यमार्गी दक्षिणपन्थी दलहरूले पहिलो स्थान हासिल गरेका हुन् । आधिकारिक तथ्यांकअनुसार सीडीयूले हेस्से राज्यमा ३४.६ प्रतिशतभन्दा बढी मत प्राप्त गरेको छ भने सीएसयूले बाभेरियामा ३७ प्रतिशत मत प्राप्त गरेको छ ।
यसका साथै दक्षिणपन्थी अल्टरनेटिभ फर जर्मनी (एएफडी) पार्टीले एसपीडी, ग्रिन पार्टी र फ्रि डेमोर्क्याटिक पार्टीद्वारा सञ्चालित वर्तमान संघीय सरकारप्रति मतदाताहरूको असन्तोषका कारण ठूलो लाभ उठाएको छ । सन् २०१८ को विधानसभा चुनावको तुलनामा यी दुई राज्यमा सीडीयू र सीएसयूले राम्रो मत प्राप्त गरेका छन् । चान्सलर स्कोल्जको गठबन्धनले भने ती क्षेत्रमा १५ प्रतिशतको हाराहारीमा मात्र मत पाएका छन् ।
