— टर्किएका राष्ट्रपति रेचेप तैय्यप अर्दोआनले हमास–इजरायल द्वन्द्व समाधानका मध्यस्थताको प्रस्ताव गरेका छन् । राष्ट्रपति अर्दोआनले यसका लागि आफ्नो कूटनीतिक प्रयासलाई निरन्तरता दिने बताउनुभएको अनाडोलु समाचार समितिले जनाएको छ ।
'यदि दुवै पक्षले अनुरोध गरेको खण्डमा बन्दीहरूको आदानप्रदानसहित कुनै पनि प्रकारको मध्यस्थताका लागि टर्कीए तयार रहेको म बताउन चाहन्छु,' अर्दोआनले भनेका छन्, 'हामीले केही समयदेखि कायम राख्दै आएको हाम्रा कूटनीतिक सम्पर्कहरूलाई निरन्तरता दिइरहेका छौँ र पछिल्ला दिनमा हामीले यसलाई अझ गति दिएका छौँ ।'
हमासले इजराइलमा अप्रत्याशित आक्रमण गरेपछि राष्ट्रपति अर्दोआनको उक्त टिप्पणी आएको हो । हमासको आक्रमणसँगै इजराइलले युद्धको घोषणा गर्दै प्यालेस्टाइनतर्फ जवाफी आक्रमण गर्दै आएको छ ।
युद्ध नैतिक बन्धनको अधीनमा रहेकोमा जोड दिँदै टर्किएका राष्ट्रपति अर्दोआनले भनेका छन्, 'दुवै पक्ष यो नैतिक बन्धनको पालना गर्न बाध्य छन्, हामीले सधैँ भने जस्तो न्यायपूर्ण शान्तिमा कसैले पनि हार्दैन ।' उनले इजरायललाई प्यालेस्टिनी क्षेत्रहरूमा बम आक्रमण रोक्न र प्यालेस्टिनीहरूलाई इजरायलमा नागरिक बस्तीहरूमा उत्पीडन रोक्न आग्रह गरेका छन् ।
मानवीय विवेक प्रयोग गर्न आग्रह गर्दै राष्ट्रपति अर्दोआनले यस्तो मध्यम कदमले शान्तिको ढोका खोल्ने बताएका छन् । 'हवाई तथा जमिन आक्रमणबाट गाजाको विनाश, मस्जिदमा बम आक्रमणका साथै अवोध बालबालिका, महिला, वृद्ध र नागरिकहरूको मृत्यु कहिल्यै स्वीकार्य छैन,' उनले भनेका छन् ।
