— एक साताअघि प्यालेस्टाइनको विद्रोही समूह हमासको आक्रमणमा बेपत्ता र बन्दी भएका इजरायलीको परिवारले सरकार तथा प्रधानमन्त्री बेन्जामिन नेतान्याहुको विरोधमा प्रदर्शन गरेका छन् । तेल अभिभमा प्रदर्शन गर्दै उनीहरूले गाजा क्षेत्रमा बन्धक बनाइएका इजरायलीको उद्धारमा सरकारले बेवास्ता गरेको बताएका हुन् । प्रदर्शनकारीले प्रधानमन्त्री नेतान्याहुको राजीनामा पनि माग गरेका छन् ।
हमासको आक्रमणबाट गत शनिबारसम्म १४ सय इजरायलीको ज्यान गएको छ । हमासले १५० जनालाई बन्धक पनि बनाएको अनुमान गरिएको छ । तर, इजरायल सरकारले भने ‘शत्रु पक्ष’ सँग वार्ता नगर्ने जनाएको छ । गत शनिबार इजरायलको राष्ट्रिय सुरक्षा परिषद्का प्रमुख तजाची हनेग्बीले ‘इजरायलले आफ्नो शत्रुसँग वार्ता नगर्ने र उनीहरूको पत्तासाफ गरिछाड्ने कसम खाएको’ बताएका थिए । त्यसपछि पीडित परिवारले जारी गरेको एक वक्तव्यमा अपहरणमा परेका नागरिकको उद्धारमा सरकारले बेवास्ता गरेको भन्दै आलोचना गरिएको थियो ।
समाचार संस्था टाइम्स अफ इजरायलका अनुसार शनिबार रक्षा मन्त्रालयअघि एकत्रित भएका प्रदर्शनकारीले प्रधानमन्त्री नेतान्याहुविरुद्ध नारा लगाएका थए । उनीहरूले ‘बन्धकमा परेकालाई छिटो फिर्ता गर’, ‘विश्वास छैन, राजीनामा देऊ’ जस्ता नारा लेखिएका प्लेकार्ड लिएर प्रदर्शन गरेका थिए ।
प्रदर्शनमा सहभागी ६२ वर्षीया मोनिका लेभी जसले आफ्नो परिवारको सदस्य २५ वर्षीय मपाल एडमलाई यस युद्धमा गुमाएकी छन्, उनले प्रधानमन्त्री नेतान्याहुलाई आफ्नै राजनीति प्यारो भएको र पीडितको कुनै वास्ता नभएको आरोप लगाइन् ।
इजरायल र हमासबीच जारी द्वन्द्वमा मर्नेको संख्या बढ्दै जाँदा प्यालेस्टाइनको पक्षमा विश्वका विभिन्न देशमा प्रदर्शन भएको छ । शनिबार अमेरिकाको वासिङ्टन डीसीमा हजारौं समर्थकले ‘फ्रि प्यालेस्टाइन’को नारा लगाउँदै प्रदर्शन गरेका थिए । अमेरिकाका अन्य राज्यमा पनि प्यालेस्टाइनको पक्षमा प्रदर्शन भएको छ । यस्तै, बेलायतको लन्डनलगायत विभिन्न स्थान, स्कटल्यान्डमा पनि प्रहरीको चेतावनीबीच प्यालेस्टाइनको पक्षमा प्रदर्शन भएको थियो । यस्तै, स्विट्जरल्यान्ड, आयरल्यान्ड, फ्रान्स, इटाली, अस्ट्रेलिया र मोरक्कोलगायत देशमा पनि प्यालेस्टाइनको पक्षमा समर्थकले जुलुस, र्याली आयोजना गरेका छन् ।
यही अक्टोबर ७ मा हमासले गाजाको सीमा क्षेत्रमा रहेका इजरायली भूभागमा आक्रमण गरेको थियो । त्यसक्रममा हमासले इजरायली नागरिक तथा सैनिकलाई बन्धक बनाएको हो । हमासले पनि हालको द्वन्द्व नसकिएसम्म बन्धकमा रहेकालाई छोड्ने कुनै वार्ता नगर्ने बताएको छ । हमासको आक्रमणपछि इजरायलले पनि उत्तरी गाजा क्षेत्रमा निरन्तर मिसाइल आक्रमण गरेको छ । यसक्रममा २ हजार ४ सय ५० जनाको मृत्यु भएको प्यालेस्टाइनी अधिकारीले जनाएका छन् ।
यसैबीच, इजरायलले अब हवाईसँगै जमिन र सामुद्रिक रूपमा पनि आक्रमण गर्ने जनाएको छ । इजरायली डिफेन्स फोर्स (आईडीएफ) ले एक वक्तव्य जारी गर्दै गाजामा अन्य माध्यमबाट पनि आक्रमण गर्ने जनाएको हो । आक्रमणका लागि आईडीएफका सैनिक गाजाको सीमा क्षेत्रमा पुगेका छन् ।
इजरायलको नाकाबन्दी र आक्रमणका कारण उत्तरी गाजाको जनजीवन कष्टपूर्ण बनेको छ । इजरायलले गत सोमबारदेखि नाकाबन्दी गर्दा गाजामा खानेपानी, विद्युत्, इन्धन तथा खाद्यान्नको चरम अभाव भएको छ । यस क्षेत्रमा बसोबास गर्ने करिब ११ लाख स्थानीयलाई इजरायलले दक्षिण क्षेत्रमा जान निर्देशन पनि दिएको थियो ।
प्यालेस्टाइन राहतको क्षेत्रमा काम गरिरहेको राष्ट्रसंघीय संस्था यूएनआरडब्लूएका निर्देशक जुलियट टौमाले द्वन्द्वका कारण एक सातामा १० लाख प्यालेस्टाइनी नागरिक विस्थापित भएको समाचार संस्था एएफपीलाई बताएका छन् । गाजाका ५ वटा प्रान्त उत्तरी गाजा, गाजा सिटी, दिर अल–बलाह, खान युनिस र राफाहमा गरी २३ लाख जनसंख्या रहेको अनुमान गरिएको छ । इजरायल र इजिप्टको सीमा रहेको यो क्षेत्र ३ सय ६५ वर्गकिलोमिटरमा फैलिएको छ ।
यसैबीच, इरानका विदेशमन्त्री हुसेन अमिर अब्दुल्लाहिनले इजरायल गाजा क्षेत्रमा प्रवेश गरे त्यसको दूरगामी असर पर्न सक्ने चेतावनी दिएका छन् । यस्तो अवस्था आउन नदिन संयुक्त राष्ट्रसंघ, सुरक्षा परिषद्लगायत जिम्मेवार हुनुपर्ने इरानको भनाइ छ । इजरायल अमेरिकाको कठपुतली रहेको आरोप लगाउँदै हुसेनले अहिले अमेरिका सहयोगका लागि अघि आएको तर युद्ध बढेमा त्यसको असर उसले पनि भोग्नुपर्ने बताए ।
समाचार संस्था रोयटर्सका अनुसार हमासमा नेता इस्माइल हानियाले कतारमा इरानका विदेशमन्त्री हुसेनसँग भेटवार्ता गरेका छन् । वार्तामा मन्त्री हुसेनले हमासले गरेको आक्रमणको प्रशंसा गरेको र आगामी दिनमा सहयोग जारी राख्ने बताएको रोयटर्सले आफ्नो समाचारमा उल्लेख गरेको छ ।
यस्तै, चीन र अमेरिकी अधिकारबीच इजरायल–हमास द्वन्द्वबारे छलफल भएको छ । चिनियाँ विदेशमन्त्री वाङ यी र अमेरिकी विदेशमन्त्री एन्टोनी ब्लिंकनबीच उक्त समस्या सुल्झाउन शनिबार कुराकानी भएको चिनियाँ विदेश मन्त्रालयले जारी गरेको एक विज्ञप्तिमा उल्लेख छ । चीनले समस्या सुल्झाउन छिट्टै अन्तर्राष्ट्रिय शान्ति सम्मेलन बोलाउन पनि अपिल गरेको छ । इजरायल–हमासबीच संघर्ष बढेपछि अमेरिकी विदेशमन्त्री ब्लिंकन हाल मध्यपूर्वका देशमा छन् । यस्तै, इजरायलको उत्तरी सीमामा इजरायल र लेबनानमा सक्रिय विद्रोही समूह हिज्बुल्लाहबीच तनाव बढेको छ । बीबीसीका अनुसार लेबनानबाट भएको मिसाइल आक्रमणमा परी एक इजरायलीको मृत्यु भएको छ । हिज्बुल्लाहले आफूले इजरायलतर्फ मिसाइल आक्रमण गरेको दाबी गरेको छ ।
