— स्पेनले नर्वेलाई १–० ले पराजित गर्दै आइतबार युरो २०२४ मा आफ्नो स्थान सुरक्षित गरेको छ । यो नतिजापछि समूह ‘ए’ बाट स्कटल्यान्ड पनि छनोट भएको छ । यस्तै, टर्की पनि युरोमा छनोट हुने अर्को टिम बनेको छ ।
बार्सिलोनाका मिडफिल्डर गाभीले स्पेनको जितमा एक मात्र गोल गरे । अर्को जर्मनीमा हुने युरोपमा स्पेन छनोटका दुई खेल अगाडि नै प्रवेश गर्न सफल भएको हो । स्पेनको यो जितले स्कटल्यान्ड पनि समूहको शीर्ष दुईमा रहने निश्चित भएको हो ।
सन् २००० को युरोयता कुनै ठूलो प्रतियोगितामा छनोट हुन असफल नर्वेसामु अब प्ले–अफको सम्भावना बाँकी छ । टर्कीले भने अर्को खेलमा लात्भियालाई ४–० ले हरायो ।
