— विश्व स्वास्थ्य संगठन (डब्लूएचओ) ले गाजा क्षेत्रमा २४ घण्टाका लागि मात्र पानी, बत्ती र इन्धन बाँकी रहेको बताएको छ । इजरायल र प्यालेस्टिनी विद्रोही समूह हमासबीचको जारी द्वन्द्वका कारण उत्तरी गाजा क्षेत्रको मानवीय स्थिति बिग्रँदै गएको चेतावनी डब्लूएचओले दिएको हो ।
मध्यपूर्व क्षेत्रका लागि संयुक्त राष्ट्रसंघको स्वास्थ्य संगठनका निर्देशक अहमद अल–मन्धारीले बमबारी भइरहेको र इजिप्टको सीमा राफा क्षेत्रमा रहेका विस्थापितलाई सहयोगका लागि अनुमति दिनुपर्ने बताएका छन् । यदि सहायता दिन नसकिएमा ‘चिकित्सकले धेरै घाइतेको मृत्युको प्रमाणपत्र तयार गर्नुपर्ने’ उनको भनाइ छ । गाजा क्षेत्रका चिकित्सकले पनि गत आइतबार इन्धन र अन्य उपकरणको अभावमा धेरै घाइते मर्न सक्ने चेतावनी दिएका थिए ।
यही अक्टोबर ७ मा हमासले इजरायलमा आक्रमण गरेपछि इजरायलले पनि जवाफी कारबाहीस्वरूप उत्तर गाजा क्षेत्रमा नाकाबन्दी गरेको हो, जसका कारण त्यहाँको जनजीवन कष्टपूर्ण बनेको छ । स्थानीय खानेपानी, विद्युत्, इन्धन र खाद्यान्न सामग्रीका लागि संघर्ष बाध्य छन् । अर्कोतर्फ इजरायलले उत्तरी गाजामा निरन्तरजसो मिसाइल आक्रमण गरिरहेको छ । त्यही कारण यहाँका १० लाखभन्दा बढी स्थानीय अन्यत्र विस्थापित भएको अन्तर्राष्ट्रिय सञ्चारमाध्यमले जनाएका छन् । हरेक मिनेटमा १ घाइते गाजा क्षेत्रका अस्पतालमा थपिइरहेको समाचार संस्था अलजजिराले उल्लेख गरेको छ ।
बीबीसीका अनुसार सोमबार साँझसम्म इजरायलको आक्रमणमा गाजा क्षेत्रमा मर्नेको संख्या २ हजार ८ सयभन्दा बढी पुगेको छ । १० हजारभन्दा बढी घाइते भएका छन् । प्यालेस्टाइनका अधिकारीका अनुसार गाजामा एक हजारभन्दा बढी व्यक्ति बेपत्ता छन् । इजरायलको आक्रमणबाट ध्वस्त भएका भवनका भग्नावशेषमा ती व्यक्तिहरू पुरिएको हुन सक्ने अधिकारीहरूको भनाइ छ । यस्तै, हमासको आक्रमणमा इजरायलमा मर्नेको संख्या पनि १ हजार ४ सयभन्दा बढी पुगेको छ ।
इजरायलको सैन्य फोर्स आईडीएफले हमासले गाजा क्षेत्रमा बन्धक बनाएकाहरू १ सय ५५ देखि १ सय ९९ जनासम्म हुन सक्ने अनुमान गरेको छ । संयुक्त राष्ट्रसंघले गाजा क्षेत्रमा सहायताका लागि गम्भीर वार्तामा रहेको बताएको छ । गाजाबाट विस्थापित भएकाहरू दक्षिणी क्षेत्रमा लागेका छन् भने इजिप्टतर्फ जान पनि हजारौंको भीड लागेको छ । तर इजिप्टको सीमा क्षेत्र नखुल्दा राफामा हजारौं अलपत्र परेका छन् । इजरायलका प्रधानमन्त्री बेन्जामिन नेतान्याहु र हमासले पनि राफा क्षेत्रबाट विस्थापितलाई इजिप्टतर्फ पार गर्न दिन र सहायताका लागि संघर्ष विराम गरेका रिपोर्टलाई खारेज गरेका छन् ।
