— नेपालले विश्वकप छनोट प्रारम्भिक चरणको दोस्रो लेगमा मंगलबार लाओसको सामना गर्दै छ । काठमाडौंमा भएको पहिलो लेग १–१ को बराबरीमा टुंगेको थियो । अबको दोस्रो लेग भियन्टाइनमा हुनेछ । नेपाली मुख्य प्रशिक्षक भिन्सेन्जो अल्बर्टो एनिसले आक्रामक रणनीति लिएर आफ्नो टिम उत्रने बताए ।
उनले भने, ‘पहिलो लेगको खेल खराब रह्यो । यसबाट पाठ सिक्दै अब खेल्नुपर्नेछ । यो खेल नेपाल र मेरा लागि निकै महत्त्वपूर्ण छ । हामीलाई अगाडि बढ्ने हो भने यो खेल जित्न आवश्यक छ । यो गाह्रो छ, तर हामी तयार छौं । नेपालले आक्रामक फुटबल खेल्नेछ । म लाओस टिमको सम्मान गर्छु र हामी राम्रो नतिजाका लागि सकारात्मक हुनुपर्छ ।’
यस्तै लाओस टिमका प्रशिक्षक कनलाया सिसोमभाङले नेपालबाट बलियो चुनौती पेस हुने स्विकारे । उनले भने, ‘हाम्रोसामु कठिन खेल छ । पहिलो लेगको खेलको हामीले निकै गम्भीर भएर विश्लेषण गरेका छौं । त्यस खेलबाट हामीले धेरै सिक्ने अवसर पनि पाएका छौं । भोलिको खेलका लागि हामी निकै उत्साहित छौं ।’
नेपाली टिमका कप्तान किरण लिम्बूले दसैंको संघारमा नेपाली फुटबल समर्थकलाई जित उपहार दिन चाहेको बताए । उनले भने, ‘अबको खेल निकै महत्त्वपूर्ण छ । पहिलो खेल केही हदसम्म निराशाजनक रह्यो । त्यसमा भएका गल्तीमा हामीले सुधार्ने प्रयास गरेका छौं । हामी दसैंको बेला नेपाली समर्थकलाई जितको उपहार दिन चाहन्छौं ।’ दशरथ रंगशालामा भएको खेलमा अञ्जन विष्टले एक गोल गर्दै नेपालका लागि सर्वाधिक १३ गोलको कीर्तिमान बराबरी गरेका थिए र अब उनको सामनु हरि खड्का र नीराजन रायमाझीको नाममा रहेको कीर्तिमानलाई उछिन्ने अवसर पनि हुनेछ । उनको त्यसै प्रदर्शन मद्दतले नेपालले एक गोलले पछाडि रहेको स्थितिबाट बराबरीको नतिजा निकालेको थियो ।
यसपल्ट छनोटको प्लेअफ नियमअनुसार अबे–गोलको फाइदा लागू हुने छैन । दुई लेगको निर्धारित समयको खेल बराबरीमा रहे, सुरुमा ३० मिनेटको अतिरिक्त समयको खेल हुनेछ । त्यसमा पनि बराबरीको स्थिति रहे, खेल टाइब्रेकरमा जानेछ । त्यसैले पनि दुवै टिम दोस्रो लेगमा आक्रामक मात्र नभएर सम्हालेर खेल्ने प्रयासमा पनि हुनेछन् ।
