— इजरायली संसद् 'नेसेत' को बैठक चलिरहेका बेला जेरुसेलममा रकेटको साइरन बजेपछि सांसदहरू सेल्टर लिन पुगेका छन् । नेसेतको सत्र चलिरहेका बेला जेरुसेलम र तेलअभिभतर्फ रकेट प्रहार भएपछि संसद्को सत्र केहीबेर स्थगित भएको टाइम्स अफ इजरायलले जनाएको छ ।
गाजा क्षेत्रबाट लामो दूरीका रहेकटहरू प्रहार भएपछि जेरुसेलम र तेलअभिभमा साइरन बजेको छ,' टाइम्स अफ इजरायलको समाचारमा उल्लेख छ, 'विस्फोटको ठूला आवाज पनि सुनिएका छन् तर कोही घाइते र क्षति भएको भने रिपोर्ट आएको छैन ।' गाजाबाट जेरुसेलम करिब ७६ किलोमिटरको दूरीमा रहेको छ ।
नेसेतको सुरुवाती सत्र चलिरहँदा रकेट प्रहार भएको पनि समाचारमा उल्लेख छ । साइरन बजेपछि सबै सांसदहरू बम सेल्टरमा गएका थिए । जेरुसेलममा खुला ठाउँमा रकेट खसेकाले कोही पनि घाइते नभएको बताइएको छ । करिब ४० मिनेटको स्थगनपछि संसद् चलेको थियो ।
संसद्मा सम्बोधन गर्दै इजरायली प्रधानमन्त्री बेन्यामिन नेतान्याहुले हमासलाई मात्र नभई हिजबुल्लाह र इरानलाई समेत इजरायललाई नजिस्क्याउन चेतावनी दिएका छन् । हमासलाई हराउन अपिल गर्दै उनले भने, 'हामीलाई नजिस्क्याउ, तिमीहरू नै नराम्ररी क्षति भोग्नेछौ ।' उनले अक्टोबर ७ बाट इजरायलले पाठ सिकिसकेको पनि बताए ।
यसैबीच इजरायली सेनाले करिब २०० जनालाई हमासले बन्धक बनाएको बताएको छ । इजरायली डिफेन्स फोर्सलाई उद्धृत गर्दै जेरुसेलम पोस्टले १९९ जना हमासको अपहरणमा परेको जनाएको छ ।
अक्टोबर ७ मा गाजाबाट हमासले इजरायली भूमिमा आक्रमण लिएपछि पश्चिम एसियामा तनाव चर्किएको हो । हमासको आक्रमणमा १३ सयभन्दा बढी इजरायली नागरिकको मृत्यु भएको छ । जसमा १० नेपालीसहित १०० भन्दा बढी विदेशी नागरिक पनि छन् । त्यस्तै इजरायली आक्रमणमा २७ सयभन्दा प्यालेस्टिनी नागरिकको मृत्यु भएको छ ।
इजरायलले गाजा क्षेत्रमा खाद्यान्नसहित खानेपानी, इन्धन र स्वास्थ्य सामग्रीको आपूर्तिसमेत बन्द गरेको छ । गाजामा १ हजारभन्दा बढी मानिस इजरायली आक्रमणबाट ध्वस्त बनेका भवनका भग्नावशेषमा पुरिएको बीबीसीले जनाएको छ । इजरायली सेनाको चेतावनीपछि उत्तरी गाजाबाट लाखौँ मानिस विस्थापित भएका छन् ।
